«Qazaqstan Jastar Fest» – Jastar jylyna arnalǵan joba. Mádenıet jáne sport mınıstrligi qolǵa alǵan bastama aıasynda «Atyrau Jastar Fest» sporttyq festıvali Jaıyq jaǵasynda tórt kún boıy saltanat qurdy. Atyraýdyń úlken-kishisi asyǵa kútken aıtýly sharaǵa álemdik sport juldyzdary kelip qatysty.
Buqaralyq sportty damytýdy maqsat etken shara baǵdarlamasy jan-jaqtylyǵymen de erekshelenedi. Belgili sport mamandary jergilikti jastarǵa sheberlik saǵattaryn ótkizse, GFC 17 halyqaralyq týrnırinde túrli saıystar uıymdastyryldy. Álemge áıgili jekpe-jek sheberleri Habıb Nýrmagomedov, Abdýlmanap Nýrmagomedov, Islam Mahachev, Zabaıra Týhýgov, Olımpıada chempıondary Roman Vlasov, Tagır Haıbýllaevtardy atyraýlyqtar qurmetpen qarsy aldy. Qazaqstandyq tanymal sportshylar Serik Sápıev, Maksım Rakov, Sergeı Morozov, Damır Ismagýlov, Bekzat Nurdáýletov, Abylaıhan Júsipov, Shavhat Rahmonovtar da festıval qonaqtary boldy.
Jas sportshylarǵa erkin kúresten KSRO sport sheberi, Reseı Federasııasyna eńbegi sińgen jattyqtyrýshy Abdýlmanap Nýrmagomedov sheberlik saǵatyn ótkizdi. Sporttyń dzıýdo, sambo, erkin kúres, djıý-djıtsý, grepplıng túrleri boıynsha oblys quramasynyń músheleri 18 álem chempıonyn daıyndap shyǵarǵan belgili bapkerden aqyl-keńester aldy. «Qazaq jastarynyń sportqa degen qulshynystary myqty ekenin kórip, qýandym. Sport jaqsy damyǵan. Memleket tarapynan úlken qoldaý bar, óte talantty jastar bar, bapkerlik quramnyń da deńgeıi joǵary», dedi Abdýlmanap Nýrmagomedov.
GFC – 17 týrnırine qatysqan atyraýlyq sportshylar Abylaı Tólesh, Jumageldi Jalǵasuly, Dáýren Ermekov, Talǵat Jumaǵalıev, Nurbergen Sharıpovtar bolashaqtarynan úmit kúttiretin jastar ekendikterin kórsetti. Al mýaı-taıdan dodaǵa túsken jergilikti sportshy Ábil Ǵalıev taılyq karsylasyn jeńip, Jayynger chempıondyq belbeýiniń ıegeri atandy.
Aralas jekpe-jek boıynsha «Gorilla Fighting Champioship 17» álemdik týrnıri – festıvaldyń eń mańyzdy oqıǵasy retinde umytylmas áser syılady.
– Jastar arasynda sportty nasıhattaýda osyndaı sharalardyń mańyzy zor, – dedi týrnırdiń ashylý saltanatynda oblys ákimi Nurlan Noǵaev. – Segiz elden eń myqty, eń úzdik degen sportshylar qatysty. О́ńir turǵyndary qyzyqty da tartysty oıyndarǵa kýá boldy. О́skeleń urpaqty jigerli bolýǵa, talmaı talaptanýǵa, jeńiske jetýge baýlıtyn, yntalandyratyn jobalardyń qatary kóbeıe bersin.
Sport festıvali oblys ortalyǵyndaǵy Isataı-Mahambet alańynda konserttik baǵdarlamamen qorytyndylandy. Buqaralyq sport túrlerinen de saıystar uıymdastyrylyp, jeńimpazdar anyqtaldy. Sharanyń qurmetti qonaǵy – UFC chempıony Habıb Nýrmagomedov: «Bizge birneshe jyl boıy Atyraýdan kelip, birge jattyǵyp júrgen sportshylar bar. Jalpy, Qazaqstanda sportqa degen, sonyń ishinde sporttyń jaýyngerlik túrine degen úlken ynta baıqalady», dep atap ótti.
Sondaı-aq festıvaldyń sońǵy kúninde Nursaıa shaǵyn aýdanynda veloortalyq ashyldy. Qazirdiń ózinde velosport seksııasyna 40-qa jýyq bala qabyldanǵan. Buqaralyq sportty damytýǵa baǵyttalǵan sharalar áli talaı jeńisterge jol ashary anyq.
ATYRAÝ