Halqymyzda «Ákimi aqynyn izdegen el baqytty» degen qanatty sóz bar. Ult rýhanııatyna olja salǵan ataqty aqyndardan bólek, búginde Áýlıeata óńirinde jas shaıyrlar shoǵyry da qalyptasyp keledi. «Rýhanı jańǵyrý» baǵdarlamasy jáne Jastar jyly aıasynda Jambyl oblystyq Sh.Ýálıhanov atyndaǵy ámbebap-ǵylymı kitaphanasynda Taraz qalasynyń ákimi Qaırat Dosaev óńirdiń jas qalamgerlerimen kezdesti.
Erkin pikir alańyna kelgen ákim áýeli Almaty shaharynda ótken stýdenttik jyldarynan estelikter aıtyp, Shyǵystyń uly shaıyry Omar Haııamnyń rýbaıatyn jáne qazaqtyń daryndy aqyny Júsip Qydyrovtyń lırıkalyq óleńin jatqa oqyp berdi. «Taraz – aqyndardyń qalasy. Kezinde kóne Tarazdyń kelbeti men arýlarynyń sulýlyǵyn Fırdoýsı sııaqty uly aqyndar «Sergiter júrek jarasyn, móp-móldir kózdiń qarasyn, Tarazdan ǵana tabasyń» dep jyrlaǵan. Búgin ózderińizdeı talantty jastarmen kezdesip otyrǵanyma qýanyshtymyn», dedi ákim. Kezdesý barysynda áńgime ádebıet taqyrybynda órbidi. Sonymen qatar ákimdiktiń qoldaýymen Áýlıeata óńirinde jas qalamgerlerdiń forýmy uıymdastyrylsa, jastardyń birqatarynyń kitaby jaryqqa shyqsa degen usynystar da aıtyldy. Budan keıin jıynǵa qatysqan Tabıǵat Abaıldaev, Danııar Álimqul, Nurbolat Satymqul, Araıly Jaqsylyq, Ǵaınıken Maraltaıqyzy jáne ózge de jas aqyndar óz óleńderin oqysa, Shapaǵat Ábdir halqymyzdyń ıgi jaqsylaryna arnaý arnady. Kesh barysynda Nurlan Ábdikárimov Shámshi Qaldaıaqovtyń «Syǵan serenadasy», Ilııa Jaqanovtyń «Jaılaýkól keshteri» atty ánderin oryndap, kópshiliktiń yqylasyna bólendi.
Emen-jarqyn áńgime barasynda Qaırat Dosaev jıynǵa qatysyp otyrǵan jıyrma jas aqynnyń báriniń kitabyn bolmasa da, úsh-tórt avtordyń jeke jınaǵyn shyǵaryp berýge bolatynyn aıtyp, olardyń árqaısysyna hakim Abaıdyń qarasózder kitabyn syıǵa tartty.
Jambyl oblysy