Qurlyqtyq hokkeı lıgasyndaǵy (QHL) kezekti týr oıynyn Nur-Sultanda ótkizgen jergilikti «Barys» Vladıvostoktyń «Admıralyna» overtaımda ese jiberdi.
Bul kezdesýge qos komanda da kóterińki kóńil-kúımen keldi. О́ıtkeni, osyǵan deıin «Barys» pen «Admıraldyń» ekeýi de qatarynan tórt básekede basymdyq tanytyp, jarys kestesindegi jaǵdaılaryn edáýir jaqsartty.
Nur-Sultandaǵy match ta asa shıelenisti ótti. Qos tarap baryn salyp aıqasty. Ásirese, aıdyn ıeleriniń qarqyny kúshti boldy. Bıylǵy maýsymda aıtýly komandalar ózara eki márte kezdesip, eki retinde de Qıyr Shyǵystan kelgen hokkeıshiler jeńiske jetken edi. Bul joly bizdiń jigittter ese qaıtarýǵa bar kúshin saldy. «Barystyń» oıynshylary qarsylastaryna qaraǵanda jıi shabýyldap, soqqyny da jıi baǵyttady. Biraq olardyń eshbiri nátıjeli bolmady. Osylaısha, 60 mınýt aralyǵynda esep ashylmaǵannan keıin oıyn overtaımǵa ulasty. Al qosymsha ýaqyttyń ekinshi mınýtynda Markýs Iýngtyń soqqan shaıbasynyń arqasynda «Admıral» jeńiske jetti.
Qazirgi kezde «Barys» Chernyshev dıvızıonynda kósh bastap, Shyǵys konferensııasynda ekinshi orynda keledi. Turaqty birinshiliktiń jarys kestesinde besinshi satyǵa jaıǵastyq. Osy kúnge deıin 16 kezdesý ótkizgen jerlesterimizdiń qorjynynda ázirge 23 upaı bar.