Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıev aýyl turǵyndaryn keń jolaqty Internetpen qamtamasyz etý boıynsha elimizde júrgizilip jatqan jumystar týraly depýtattarǵa aıtyp berdi. Bul týraly Sıfrlyq damý, ınnovasııalar jáne aeroǵarysh ónerkásibi mınıstrliginiń baspasóz qyzmeti habarlady.
2019 jyldyń sońyna deıin baılanys operatorlary Qazaqstannyń on bir oblysyna, naqtyraq aıtqanda oblys, aýdan ortalyqtarynan shalǵaıda ornalasqan 462 eldi mekenge talshyqty-optıkalyq baılanys jelilerin júrgizedi. Osylaısha, 496 mektep, 389 aýrýhana, 312 ákimdik, apattyq qyzmetterdiń 13 bólimshesi, aýyl sharýashylyǵy salasynyń50 pýnkti jáne t.b. joǵary jyldamdyqty ınternetke qosylý múmkindigine ıe bolady.
Bul jumys aýdan jáne oblys ortalyqtarynan shalǵaıda ornalasqan aýyl turǵyndaryn sapaly ınternetpen qamtamasyz etý úshin "Sıfrlyq Qazaqstan" baǵdarlamasy aıasynda qolǵa alynǵanyn aıtyp ótkimiz keledi. Osy oraıda, elimizde qazirgi ýaqytta 2 negizgi joba júzege asyrylýda:
-talshyqty-optıkalyq baılanys jelisiniń qurylysy. Joba tolyq iske asqan jaǵdaıda, 2020 jyldyń sońynda 1 250 aýyldyq eldi mekenniń turǵyndary joǵary jyldamdyqty Internetke qol jetkizedi;
-2020-2022 jyldar ishinde LTE (4G) uıaly baılanys jelisin jáne basqa da tehnologııalardy damytý arqyly 3 143 aýyl ınternetpen qamtamasyz etiledi.
Joǵaryda kórsetilgen jobalardy iske asyrý sheńberinde 2020 jyldyń sońyna deıin turǵyndarynyń sany 250-den asatyn 880 aýyl keń jolaqty Internet jelisine qol jetkizedi. Júrgizilgen jumystardyń nátıjesinde 2022 jyly 5 089 aýyldyq eldi meken Internet jelisimen qamtylady.