Parallel
Ánıpany ortalyq alańda kórdim. Balalaryn ertip alypty. Janyna baryp aman-saýlyq suraıyn dep bir oqtaldym da kózine túspeı-aq qoıǵandy jón kórdim. Kúıeýi ólgennen keıin janarynan nur taıyp, jasyp qaldy baıǵus áıel.
Budan birneshe jyl buryn ǵana osy Japaqovtarda bári de asta-tók edi. Dúnıe oılamaǵan jerden tóńkerilip tústi. Qudaıǵa kúpirshilik jasap, qońyr tirlik keshkenderge joǵarydan qarap kelgen otbasyn bir-aq kúnde qaıǵy basty. Otaǵasy júrek talmasynan o dúnıelik boldy da eshqaıda jumys istep, eshkimniń aldyna baryp kórmegen Ánıpa úsh balasynyń janynda shoshaıyp jesir qaldy. Búgin olar – járdemaqyny nápaqa ǵyp, sonymen kúneltip otyrǵan turmysy tómen otbasy.
... Ánıpa alǵashynda aınalasyndaǵy týys-týǵan, tamyr-tanystardyń báriniń kómeginen bas tartqan. Burq-sarq etip shamdanǵan. О́zine ar sanaǵan. Biraq tańnyń atýy áteshtiń shaqyrýyna qaramaıdy eken, bara-bara taǵdyrdyń basqa salǵanyna eriksiz moıyn usynǵan. Kúnkórisi jutań jandarmen jumys isteıtin ınspektor búıte berse jaǵdaıdyń jaqsarmaıtyndyǵyna, elden jınalǵan kıim-keshek, taǵy basqalardan bas tartýǵa bolmaıtyndyǵyna sendirgen. Al ákeden qalǵan azyn-aýlaq dáýletti balalarynyń oqýyna jaratýǵa kóndirgen. «Basqa túsken baspaqshyl» degen, eki jyldan keıin Ánıpanyń ózi qamqorshylyqpen aınalysatyn úkimettik oryndarǵa alaqan jaıyp, kómek suraýǵa májbúr boldy. Endi ol balalaryn ertip, aksııa boıynsha jınalǵan, kıilgen kıim-keshekterdi tegin taratatyn jerge jıi baryp turady. Balalaryna jaramdy kıim tańdaıdy. Burynǵydaı qysylyp-qymtyrylmaıdy, kóńili de, ózi de kómpistenip, kóndigip alǵan. Taǵdyrdyń talmaý jerden tıgen soqqysyna qasqaıyp qarsy turý da – erlik. Ánıpa sondaı erlikke urpaǵy úshin baryp otyr. Tym qartaıyp, júzinen nur taıyp turmasa da oılaǵany – óz qamy emes, balalarynyń baǵy. Analyq aq armany – solardyń janaryna jas úıiriltpeý. El qatarly azamat etip shyǵarý.
Iá, bul dúnıede bári de parallel: torqaly toı men topyraqty ólim de, baq pen sor da, tipti jer basyp júrgen pendelerdiń ózderi de... Eshkim de jazmyshtyń jazýynan qashyp qutylmaıdy...
* * *
... Jas arýdaı jasanyp taǵy da áz Naýryz keldi. Shapaǵat pen mahabbat, meıirim aıy. Osy aıda jasalǵan jaqsylyqtyń myń márte qaıtarymy bolady desedi. Quranda da, Injilde de solaı delingen.
Jumaǵazy IGISIN