Keshe tennısshilerdiń álemdik reıtıngi qaıta jańardy. Erler arasynda qazaqstandyq sportshy Aleksandr Býblık TOP-50 tennısshiniń qatarynan shyǵyp qalsa, qyzdar arasynda Elena Rybakına sát saıyn joǵarylap keledi.
Erler arasyndaǵy reıtıngtik kósh basynda aıtarlyqtaı ózgeris joq. Ispanııalyq Rafael Nadal aldyna jan salmaı keledi. Ekinshi orynda Serbııanyń sańlaǵy Novak Djokovıch ornalassa, úzdik úshtikti shveısarııalyq Rodjer Federer túıindep tur. Al qazaqstandyq tennısshiler arasynda elimizdiń birinshi raketkasy Aleksandr Býblık 10 saty tómendep, 58-orynǵa jaıǵasty. Mıhaıl Kýkýshkın 67-ornyn saqtap qalsa, Dmıtrıı Popko úsh saty joǵarylap 186-orynǵa turaqtady.
Qyzdar arasynda aýstralııalyq Eshlı Bartıdiń baǵy janyp tur. Jasyl qurlyq ókilin chehııalyq Karolına Plıshkova men japonııalyq Naomı Osaka ókshelep tur. WTA reıtınginde «TOP-100» tennısshiniń qataryna da úsh otandasymyz enip otyr. Olar – Iýlııa Pýtınseva (34-oryn), Elena Rybakına (36-oryn) jáne Zarına Dıas (78-oryn).