Soltústik-Shyǵys kólik kompanııasy suıytylǵan tabıǵı gaz tasymaldaıtyn avtoparkti iske qosty.
Global Gas Group respýblıkalyq energetıkalyq jobasy aıasynda jumys isteıtin avtopark arqyly Reseıdiń Ekaterınbýrg qalasynan suıyq tabıǵı gaz jetkizilip, elimizdiń basqa qalalaryna da taratylady.
Soltústik-Shyǵys kólik kompanııasy arnaıy gaz tasymaldaıtyn sısternalardy satyp alyp, ornatýǵa 600 mln teńge jumsaǵan. Mamandardyń aıtýynsha, suıytylǵan tabıǵı gaz qorshaǵan ortaǵa qaýipsiz. Baǵasy da arzanyraq.
«38 jańa jumys orny quryldy. Suıytylǵan tabıǵı gaz tasymaldaıtyn 10 «Volvo» satyp alyndy. Ekaterınbýrgten suıyq otyndy qatyryp ákelip, qaıta jabdyqtaý stansalary arqyly qoldanystaǵy gazdy alamyz», deıdi Soltústik-Shyǵys kólik kompanııasy basshysynyń orynbasary Oleg Seksenbaev.
Jeltoqsan aıynda «Molprodýkt» JShS-i suıytylǵan tabıǵı gazdy qaıta jabdyqtaý stansııasyn ashyp, gazǵa kóshpek. Jobany júzege asyrý úshin 300 mln teńge ınvestısııa tartylmaq. Ázirge mazýt otynyn paıdalanyp júr. Mundaı stansııa Nur-Sultan qalasynda jáne Býrabaıdaǵy Rixos qonaq úıinde ǵana bar eken.
Energetıka jáne TKSh basqarmasynyń jetekshisi Ádilbek Áýbákirovtyń aıtýynsha, gaz tasymaldaý kompanııasy Qazaqstandaǵy Global Gas Group iri fırmasynyń enshiles kásiporny kórinedi. Ol jergilikti naryqta 2015 jyldan beri qyzmet etip keledi.