Pıttsbýrg Ýnıversıtetiniń Medısına mektebi Nazarbaev Ýnıversıtetinde elimizdiń densaýlyq saqtaý, medısınalyq bilim men bıomedısınalyq zertteýler salasyndaǵy jańa kóshbasshylar bolyp tanylǵan ǵalym dárigerlerdi daıarlaıtyn Medısına mektebin ashpaq.
«Bul bizdiń Medısına mektebimiz úshin bilim berý salasyndaǵy áriptestiktiń eleýli úlgileriniń biri bolyp tabylady», – dep atap ótti Pıttsbýrg Ýnıversıtetiniń medısına doktory, medısına ǵylymdarynyń bas vıse-kansleri jáne Medısına mektebiniń dekany Artýr S.Levın.
«Nazarbaev Ýnıversıteti Qazaqstannyń elordasynda – Astana qalasynda Medısına mektebin qurý kezinde konsýltasııalar men tehnıkalyq qoldaý alý úshin strategııalyq áriptesti izdegen bolatyn, – dedi doktor Levın. – Nazarbaev Ýnıversıtetiniń Medısına mektebi Ulttyq medısınalyq holdıngtiń klınıkalaryna jaqyn jerdegi, stýdentterge tájirıbelik baza bolyp tabylatyn kampýsta ornalasatyn bolady. Biz bıomedısına salasyndaǵy doktorlar men zertteýshilerdiń jańa býynyn daıarlaýǵa arnalǵan amerıkandyq stıldegi oqý baǵdarlamasyn qurý úshin bar bilim men tájirıbemizdi salamyz».
Pıttsbýrg Ýnıversıtetiniń Medısına mektebiniń sarapshylary Nazarbaev Ýnıversıtetine medısınalyq oqý baǵdarlamasynyń bazasyn qurý men damytý, akademııalyq basshylyq quram men oqytýshy-professorlar quramyn jaldaý jáne daıarlaý, uıymdyq jáne ákimshilik qurylymdy, erejeler men rásimderdi josparlaý, oqý baǵdarlamasyn, sabaq josparlaryn qurastyrý men Ulttyq medısınalyq holdıngtiń klınıkalarynan mamandardy tarta otyryp klınıkalyq praktıkany júrgizý máseleleri boıynsha konsýltasııa beretin bolady.
«Pıttsbýrg Ýnıversıtetiniń Medısına mektebimen yntymaqtastyqta úzdik dárigerlerdi daıarlaý maqsatynda biz medısınalyq bilimniń jańa modelin qurýdy josparlap otyrmyz», – dedi Nazarbaev Ýnıversıtetiniń prezıdenti Shıgeo Katsý. –Bizdiń maqsatymyz Qazaqstanda ıntegrasııalanǵan akademııalyq densaýlyq saqtaý júıesin qurý jáne sońynda elimizdiń basqa aımaqtarynda Qazaqstannyń densaýlyq saqtaý júıesin jaqsartý úshin osy modeldi taratý bolyp tabylady».
Oqytý aǵylshyn tilinde júrgiziletin Medısına mektebi 2015 jyldyń kúzinde ashylady dep kútilip otyr. Talapkerler amerıkandyq medısına mektebiniń, onyń ishinde premedısına daıyndyq baǵdarlamasy men Medical College Admissions Test mamandandyrylǵan emtıhannyń talaptaryna uqsas talaptarǵa sáıkes bolýlary tıis.
Qazaqstan Nazarbaev Ýnıversıtetinde О́mir týraly ǵylymdar ortalyǵy men Energetıkalyq zertteýler ortalyǵynyń ǵalymdary men zertteýshilerine qysqa merzimdi trenıngterdi júrgizý arqyly Pıttsbýrg Ýnıversıtetin bıomedısına salasyna 2011 jylǵy maýsymnan bastap tarta bastaǵan bolatyn.
Birlesken yntymaqtastyq 2012 jylǵy shildede keńeıtildi, Pıttsbýrg Ýnıversıtetiniń Medısınalyq Ortalyǵy (UPMC) Nazarbaev Ýnıversıtetin otandyq onkologııa men 300 oryndy, ambýlatorııalyq kómekti, ǵylymı zertteýlerge arnalǵan baza men qonaq úı keshenin qamtıtyn gospıtali bar zertteý ortalyǵynyń qurylysyn damytýǵa qoldaý kórsetý retinde tańdap alǵan bolatyn.
«Egemen-aqparat».