Kenshiler astanasynda oblystyq «Jyl muǵalimi» baıqaýy márege jetip, jeńimpazdar men júldegerler anyqtaldy.
Mártebeli mamandyq ıeleriniń saıysyna óńirdiń 34 muǵalimi baq synap, onyń ishinde 12-i sheshýshi kezeńge joldama alǵan bolatyn. Baıqaýdyń alǵashqy kezeńi aýdandar men qalalar deńgeıinde ótti. Ekinshi kezeńde úmitkerler oblystyq mamandandyrylǵan «Murager», «Daryn» mektep-ınternattary jáne № 93 gımnazııa bazasynda sabaqtar men synyptan tys is-sharalardy ótkizý tapsyrmalary boıynsha bilik jarystyrdy.
Al sheshýshi kezeńde qatysýshylar ózderin tanystyryp, «Ashyq mıkrofon» baıqaýynda usynylǵan taqyryptar boıynsha oı bólisti, sodan keıin pedagogıkalyq jaǵdaılardy taldady.
Arnaıy komıssııanyń sheshimimen baıqaýdyń bas júldesi men «Jyl muǵalimi» ataǵyn Balqash qalasyndaǵy №10 mektep-balabaqsha kesheniniń muǵalimi Oljas Sáýrikov jeńip aldy.
Birinshi orynǵa № 97 gımnazııanyń tarıh páni muǵalimi Oleg Te ıe bolsa, júldeli ekinshi oryn oblystyq tirek-qımyl apparaty buzylǵan balalarǵa arnalǵan mektep-ınternattyń qazaq tili men ádebıeti pániniń muǵalimi Gúlnur Qalıevaǵa buıyrdy. Al úshinshi júldeni Saran qalasyndaǵy №2 mektep-balabaqsha kesheniniń aǵylshyn tili muǵalimi Darıa Hohlova qanaǵat etti.
Sonymen qatar, atalǵan baıqaýda birneshe atalym boıynsha júldegerler anyqtaldy. Mysaly, «Úzdik sabaq» nomınasııasy boıynsha №8 gımnazııanyń hımııa pániniń muǵalimi Gúlnár Bımendına jeńimpaz atansa, «Úzdik synyptan tys shara» atalymynda Shet aýdanynyń ókili, J.Aqylbaev atyndaǵy mektep-gımnazııasynda tarıh pániniń muǵalimi Erbol Qyzylov top jardy. «Úzdik úı tapsyrmasy» nomınasııasy boıynsha Sátbaevtaǵy Abaı atyndaǵy №2 orta mekteptiń aǵylshyn tili muǵalimi Merýert Ábisheva úzdik atandy. Al, «Kórermender kózaıymy» atalymy boıynsha Buqar jyraý aýdanyndaǵy Úshtóbe orta mektebiniń bastaýysh synyp muǵalimi Botagóz Alına jeńimpaz atandy.
«Jyl muǵalimi» baıqaýynyń jeńimpazdar men júldegerlerge dıplomdar men aqshalaı syılyqtar tabys etildi.