«Satıra qurdymǵa ketti!..» sııaqty sózder men Úmbetbaı Ýaıdın aıtpaqshy, satıraǵa tutqıyldan shabýyldaýshylardan sharshaǵan mezgil. Jas tilshiler de: «Satıra ómir kóshinen nege keshigip jatyr?», deıdi.
Jýyrda jaǵymdy jańalyq jetti. Qazaq mádenıeti men ádebıetiniń aq ordasy sanalatyn Almaty shaharyndaǵy «Nurly álem» baspasynan – Mańǵystaý jýrnalıstıkasynyń belgili ókili, qazaq satırasynyń sarbazy, «Egemen Qazaqstan» gazetiniń Balǵabek Qydyrbekuly atyndaǵy respýblıkalyq syqaqshylar baıqaýynyń laýreaty, Qazaqstan Jýrnalıster odaǵynyń múshesi, Mańǵystaý aýdanynyń qurmetti azamaty – Ázirbaıjan Qonarbaevtyń «Kúlki bazar» atty satıralyq jınaǵy jaryq kórdi.
Anaý-mynaý emes – 500 bettik kitapqa saıypqyran satırıktiń sońǵy jyldary jazylǵan túınek-túınek satıralary, shyndyqqa toly shymshymalary, zildeı bolǵan ázilderi men feletondary, ıýmorlyq óleńderi men qaljyńbas áńgimeleri jınaqtalǵan.
Aqynnyń budan basqa 60-tan astam shejirelik, tarıhı-tanymdyq, ádebı satıralyq kitaptary jaryq kórgen. Ázekeńniń elge tanymal osy kúnge deıin jaryq kórgen «Túrli-túrli tántanaı», «Oıbaı ǵana qudaı-aı», «Jaımabazar» kitaptary kóptiń kóńilinen shyǵyp, dúıim halyqty kúlkige batyrǵan edi. Endi, mine sondaı oǵy alysqa tıetin qaljyń qaltaǵa, ájýa men ázilge, qısyq sóz ben qyńyr sózge toly syqaq dúnıeleri oqyrmanǵa taǵy da jol tartty.
Qazaq – qaljyńqoı halyq. Kúlli álemniń kúlkisin oqımyz da, óz kúlkimizdi álemge pash ete almaıtynymyz qynjyltady. Sondyqtan qazaq satırasyna taǵy da bir súbeli eńbektiń kelýi – búgingi qazaq satırasynyń bolashaǵy jarqyn ekendiginiń aıqyn dáleli bolmaq. Qazaq kúlkisiniń koroli Ospanhan Áýbákirov, Úmbetbaı Ýaıdın, Ǵabbas Qabyshulynyń aq batasyn alyp, «Satıra» atty aralǵa máńgilik turaqtaǵan Ázekeńniń álemi áli talaı jurtty tańǵaldyryp, tańdaı qaqtyratyny sózsiz.
Aralbaı MAQAN
Mańǵystaý oblysy