Densaýlyq saqtaý mınıstrligi 2020 jyldyń 1 aqpanyndaǵy Qazaqstandaǵy koronavırýs boıynsha epıdemıologııalyq jaǵdaıdy Facebook paraqshasynda jarııalady.
«QHR men shekaralas memleketterden kelgen azamattarǵa monıtorıng jalǵasýda. Máselen, 2020 jyldyń 6 qańtarynan 1 aqpan aralyǵynda elimizge 27 myń 53 adam keldi. Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıtetiniń sanıtarlyq-karantındik pýnktteriniń mamandary Almaty qalasyndaǵy halyqaralyq áýejaıda - 20 myń 208 adamdy, temirjol vokzaldarynda – 399 jolaýshyny tekserdi. JRVI belgilerimen 75 adam kópshilikten oqshaý aýrýhanaǵa jatqyzyldy, onyń 31-i jazylyp shyqty, qazir stasıonarlarda medısınalyq baqylaýda 44 adam qaldy» delingen habarlamada.
Aýrýhanaǵa jatqyzylǵandardyń barlyǵynyń synamasyn qosymsha baqylaý úshin Almatydaǵy Aıqymbaev atyndaǵy asa qaýipti juqpaly aýrýlardyń ulttyq ǵylymı ortalyǵyna jiberildi. Bul ortalyq jańa koronavırýsty PTR-dıagnostıkalaý ádistemesi ıgergen.
DSM respýblıkada terapııa úshin qajetti dári-dármek pen medısınalyq buıymdar bar, juqpaly aýrýhanalardy oqshaýlaýǵa arnalǵan bokstar, arnaıy dárigerlik jáne orta medısınalyq personal daıyndalǵandyǵyn aıtty.
Jaǵdaı QR Densaýlyq saqtaý mınıstrliginiń turaqty baqylaýynda, kez kelgen suraq boıynsha táýlik boıy jumys isteıtin 1406 baılanys-ortalyǵyna qońyraý shalýǵa bolady.