Qurlyqtyq hokkeı lıgasynda (QHL) synǵa túsip jatqan elordanyń «Barys» klýby «Barys Arenada» Ombynyń «Avangard» komandasynan basym tústi.
Matchty tamashalaýǵa jınalǵan 10 myńnan asa jankúıer 7 shaıbanyń kýási boldy. Tartysty ótken kezdesýdiń birinshi kezeńiniń sońynda «Barys» oıynshylary san basymdyǵyn paıdalanyp, eki mınýtta «Avangard» qaqpasyna eki gol soqty. Alǵash Dmıtrıı Gýrkov esepti ashsa, Kırıll Panıýkov tablodaǵy kórsetkishti 2:0-ge jetkizdi.
Ekinshi kezeń basynda Alekseı Maklıýkov «Barystyń» úshinshi shaıbasyn soqty. Arada bes mınýt ótkende Semıon Rýchkın esepti qysqartqanymen, Pavel Akolzın jyldam qarymtasyn qaıtaryp, «Barystyń» jeńisin naqtylaı tústi. Kezeń aıaqtalar tusta «Avangard» sapynan Sergeı Shýmakov pen Kırıll Semıonov mergendigimen kózge túskenimen, komandasyna jeńis syılaı almady. Qorytyndy esep – 4:3.