Mamandyǵym muǵalim bolǵandyqtan ba eken, ara-tura mektepke soǵyp turǵandy unatamyn. Birde jolym túsip, Qostanaıdaǵy №24 «a» qazaq bastaýysh mektebine bardym. Eńseli de sáýletti ǵımarattyń ishi kirse shyqqysyz. Jyly, jınaqy, tap-taza. Mektep dırektorynyń oqý isi jónindegi orynbasary Gúlnar Sársenbaevaǵa oqýshylarmen kezdesip, áńgimeleskim keletinin aıttym. Ol kisi 3 «a» synybyna bastap keldi. Balalarmen kezdesip, tanysyp, bilistik. Oqýlary jaıly suraǵanymda bári japa-tarmaǵaı «jaqsy oqımyz» dep jaýap berdi.
Bir sát únsizdikten keıin ózim ala kelgen «Ulan» gazetin kórsetip, «muny jazdyryp alasyńdar ma?» degenimshe birazy qoldaryn kóterip te úlgerdi. 14 oqýshy alady eken, rıza bolyp qaldym. Áńgimeni gazet tóńireginde órbitip, onyń oqýshyǵa bereri mol ekenin, oı-órisińdi keńeıtip, kóptegen jaıttan habardar etetinin áńgimeledim. «Mine qarańdarshy, jer-jerden gazettiń jas dostary hat-habar joldap, mekteptegi jańalyqtar, aýyl-qala ómiriniń tynys-tirshiligi, tanymal tulǵalarmen kezdesý sátin jazyp jatady. О́leńder men shaǵyn áńgimeler, sýretter men sanjumbaqtar, jumbaq, jańyltpashtaryn joldaıdy».
О́z basym osy gazetti úzbeı oqyp otyramyn. Sondaǵy bir baıqaǵanym, bizdiń óńirden jazatyndar neken-saıaq. Oqta-tekte Amankeldi, Torǵaı, Arqalyq aýdandary jaqtan materıaldar kezigedi. Naýyrzym aýdanynyń Qoja aýylynan jazǵan bir maqalany kózim shalǵany bar. Mektepte ótip jatatyn keshter, óndiris ozattarymen, soǵys ardagerlerimen kezdesý, oqý ozattary, beldi sportshylar týraly nege jazbasqa? Mine, balalarǵa osylaısha oı usyndym.
Búgingi ata-analardyń bári bilimdi, alaıda kóbi balasynyń oqýyna kóńil bólmeıdi, salǵyrt qaraıdy. Kóptegen ata-ana balalarynyń gazet-jýrnalǵa jazylýyna kóńil bólmeıdi. Bul basylymdar oı-órisińdi keńeıtip, dúnıe-tanymyńa yqpal etedi. О́kinishtisi, keıbir ata-ana osyny eskermeıdi-aý.
– Qaladaǵy bul bilim ordasynda 600-den astam bala tálim-tárbıe alyp, bilim negizinen sýsyndaýda. Osynda basqa ulttyń 9 balasy oqıdy. Bilimniń berik negizi bastaýyshta qalanatyny belgili. Bul mektepte 40 muǵalim jumys isteıdi, bári derlik joǵary bilimdi, tájirıbeli ustazdar. Muǵalimderdiń qajyrly eńbeginiń nátıjesi bolsa kerek, shákirtterdiń teń jartysy «4» pen «5-»ke oqıdy. Informatıka, dene shynyqtyrý, beıneleý óneri, horeografııa sabaqtaryn arnaýly bilimi bar muǵalimder júrgizedi. Orys jáne aǵylshyn tili sabaǵynda synyp topqa bólinedi. Mektepti jaqsy bitirgender synaq arqyly qaladaǵy Y.Altynsarın atyndaǵy daryndy balalar mektep-ınternaty men S.Máýlenov atyndaǵy mektep-gımnazııaǵa qabyldanady. Endi bir top oqýshy qalaýlary boıynsha áskerı oqý ornyna túsýge daıyndaıtyn kadet synybynda oqýyn jalǵastyrýda. Jasyratyny joq, oqýshylar arasynda oqı almaıtyn, oıyn tolyq jetkize almaıtyndar bar. Sodan da olardyń bilim deńgeıi tómen. Til bilmegen balaǵa oqý qona ma? Kóptegen ata-ana balamen jumys isteýge enjar, – deıdi dırektordyń oqý isi jónindegi orynbasary Gúlnar Sársenbaeva. Iá, bul ashy da bolsa shyndyq. Ata-ana men muǵalim birlese jumys istese ǵana kópshilik túzetiler bolar.
Mektep qalada ótip jatatyn túrli baıqaýlar men konkýrstarǵa, týrnırlerge, saıystarǵa qatysyp, júldeli oryndarǵa ıe bolǵanyn aıtqan jón. Máselen, 2012-2013 oqý jylynda qala reıtınginde mektep 1-orynǵa shyǵyp, bir mıllıon teńge aqshalaı syılyqqa ıe boldy. Mektep shahmatshylary eki jyl qatarynan I, II oryndy jeńip aldy. Kórkemónerpazdar baıqaýynda júldeli II orynnan kórindi. Barlyq jetistikterdi sanamalap shyǵý maqsat emes, olar kóp-aq. Oqýshylar túgel ystyq tamaqpen qamtylǵan. Turmysy tómen 18 otbasynyń balalary bıýdjet esebinen tegin tamaqtanady. Taǵamdar nárli, jemis-jıdek, salat únemi bolady, baǵasy qymbat emes. Osynda dámhana da jumys isteıdi.
– Bizde ulaǵatty ustaz atanyp, ata-analardyń qurmeti men iltıpatyna bólengen muǵalimder kóp-aq. Botakóz Dónenbaeva, Saǵıla Álimbaeva, Baldyrǵan Rabaeva, Lıazzat Kárimova, Roza Táttibaeva, dırektordyń oqý jáne tárbıe jumys jónindegi orynbasarlary G.Sársenbaeva men N.Qasenova jáne basqalar shákirtterdiń júregine jol taýyp, olardyń oqý-bilimge degen qushtarlyǵyn arttyra biletin maıtalman ustazdarymyz, – deıdi mektep dırektory Sáýle Eleýsizqyzy Kárimova.
Iá, shynynda bilikti basshy muǵalimderdiń shyǵarmashylyqpen jumys isteýine qolaıly ahýal týǵyza biledi, bul olardyń jemisti jumys isteýine ıgi yqpal etetini haq.
Qanapııa MYRZAǴOJIN,
Qazaqstannyń Qurmetti jýrnalısi
Qostanaı