О́mirde qıyn jaǵdaıǵa tap bolǵan jandarǵa tegin quqyqtyq keńes berýge baǵyttalǵan «Qorgau» aksııasy bıyl da jalǵasady. Bul týraly Ortalyq kommýnıkasııa qyzmetinde bolǵan brıfıngte joba jetekshisi, «Eurasian Expert Council» qorynyń prezıdenti Shyńǵys Lepsibaev málimdedi.
Qoǵamnyń zańger keńesine júginýge qarjylaı múmkindigi joq álsiz toptaryna arnalǵan joba alǵash byltyr tamyz aıynan bastap júzege asa bastaǵan. Sol ýaqyt aralyǵynda zańgerler 20 myńnan astam turǵynnyń máselesin sheshýge kómektesken. Uıymdastyrýshylardyń aıtýynsha, joba iri qala ortalyqtarynan góri, oblystar men aýdan turǵyndaryna baǵyttalǵan. Sebebi Nur-Sultan, Almaty sekildi ortalyq qalalarda turatyn adamdar keńes alýǵa memlekettik ne jergilikti basqarý organdardyń qabyldaýyna jazyla alady, al ınterneti joq aýyldyq jerlerdiń turǵyndarynda mundaı múmkindik joq. Quqyqtyq keńes beretin zańgerler erikti negizde jumys isteıdi, qyzmetteri úshin qordan nemese joba uıymdastyrýshylarynan qarajat almaıdy. Uıymdastyrýshylar Volonterler jylynda júzege asyp jatqan bul jobanyń Qazaqstan turǵyndarynyń quqyqtyq biliminiń artýyna, zań máselelerine kelgende saýatty bolýǵa kómektesetinine senimdi.
«Qazaqstannyń Aqparat jáne qoǵamdyq damý mınıstrligi, Jastar jáne otbasy isteri komıteti men «Eurasian Expert Council» qory 2019 jyly bastalǵan ıgi jobany ári qaraı jalǵastyrý týraly sheshim qabyldady. «Qorgau» aksııasy arqyly turǵyndarymyz naqty kómek alyp, jobanyń ıgiligin kórip jatsa biz aldaǵy jyldary da jobany júzege asyrýǵa tyrysamyz», deıdi Jastar jáne otbasy isteri komıteti tóraǵasy Madııar Kojahmet.
Qazaqstannyń barlyq oblys jáne aýdan ortalyqtarynda memlekettik grant kómegimen 210 keńse ashylǵan. Onda turǵyndarǵa kómekti keminde 3 jyldyq tájirıbesi bar bilikti mamandar kórsetedi. Tegin quqyqtyq keńes berýge advokattar alqasy nemese zańgerler palatasynyń músheleri kelisken. Zańgerler ózderiniń basty qyzmetimen qatar, osyndaı erikti jumyspen de aınalysatyn kórinedi. Jobanyń basty seriktesteriniń biri Adilzanger Zań keńesshileri palatasynyń atqarýshy dırektory Jibek Hamıtovanyń aıtýynsha, Qazaqstannyń barlyq óńirlerinen 300-den astam zańger palata múshesi. Olar turǵyndarǵa keńes berýmen qatar, sotta múddesin qorǵaýǵa daıyn. Joba boıynsha kelip túsken ótinishtiń kóbisi azamattyq ister eken, kóp jaǵdaıda adamdar memleketten alatyn qarjylaı kómek, ajyrasý nemese jalaqyǵa qatysty máselelerge shaǵymdanady. Mysalǵa, Atyraý oblysynyń aýdandarynyń birinde ataýly áleýmettik kómekti durys eseptemegeni týraly birneshe kóp balaly anadan ótinish kelgen. Zańgerlerdiń qaıta esepteý týraly usynystaryna aýdanda jaýap bolmaǵan soń, olar máseleni oblystyq deńgeıde sheshýge tyrysqan. Nátıjesinde, AÁK mólsheri qaıta eseptelip, tıisti qarajatty ala almaı kelgen turǵyndar oń nátıjege qol jetkizgen. Bul kelip túsken 20 myń ótinishtiń bireýi ǵana, osy sekildi 18 myń is oń sheshilgen.
Sondaı-aq uıymdastyrýshylar jaǵdaıǵa baılanysty respýblıka boıynsha quqyq qorǵaý qyzmetimen aınalysatyn 70-ten astam qoǵamdyq uıymmen jumys isteıdi. Odan bólek zańgerlerdi daıyndaıtyn 175 oqý ornymen kelisip, 407 joǵary kýrs stýdentterin taǵylymdamadan ótkizgen. Joba jetekshisi Shyńǵys Lepsibaev bul tájirıbe bolashaq mamandar úshin biliktigin arttyrýda taptyrmas múmkindik ekenin aıtady.
Quqyqtyq keńes keńselerde betpe-bet qana emes, telefon arqyly nemese onlaın júre beredi, tek ótinish bildirýshi ózine yńǵaıly ádisin tańdasa boldy. Jobanyń basy-qasynda júrgender kóp turǵyndardyń quqyqtyq máselege kelgende biliminiń azdyǵy sonsha, máselesin telefon arqyly baıandap bere almaıtynyn aıtady. Bul halyqtyń quqyq salasynda bilim deńgeıiniń tómendigin kórsetse kerek. Qaıta jalǵasqan jobaǵa kóp balaly otbasylar, múmkindigi shekteýli jandar, turmystyq zorlyq-zombylyq qurbandary, zeınetkerler, mıgranttar men azamattyǵy joq adamdar, jumysshylar, jýrnalıster túrli saýaldary boıynsha júgine alady.