Jýyrda Nur-Sultan qalasynda ótken «IESO-2020» halyqaralyq olımpıadasynyń irikteý kezeńinde Qyzylorda qalasyndaǵy Nazarbaev zııatkerlik mektebiniń 11-synyp oqýshysy Álisher Altynbasov geologııadan joǵary nátıje kórsetip, olımpıadanyń II oryn ıegeri atandy. Endi ol jazǵy demalysta Reseı Federasııasynyń Túmen qalasynda ótetin bilim baıqaýynda el namysyn qorǵaıtyn bolady.
El astanasynda ótken saıysta Álishermen birge osy mektepte oqıtyn Gúldana Sábıtova men Nurdáýlet Qonysbaev jer týraly ǵylym boıynsha úzdik bilimderimen erekshelenip, II jáne III oryndardan kórindi.
– Barlyq tapsyrmalar aǵylshyn tilinde boldy. Olımpıadada biz Nazarbaev Ýnıversıtetiniń ǵalymdarymen kezdesip, kásibı baǵdar aldyq. Bolashaqta ómirimdi geologııamen baılanystyrǵym keledi, – deıdi olımpıada jeńimpazy.
Baıqaýǵa el óńirlerinen 100-ge jýyq oqýshy jınalypty. Olar geologııa, geofızıka, meteorologııa, muhıttaný jáne astronomııa pánderinen kúrdeli tapsyrmalar oryndady. Birinshi oryndardy ıelengen daryndylardan Qazaqstan quramasy jasaqtalyp, halyqaralyq saıysta el namysyn qorǵaıtyn bolady.
IESO – álemdegi eń bedeldi olımpıadanyń biri. Osyǵan deıin Koreıa, Italııa, Ispanııa, Brazılııa, Japonııa jáne Fransııada ótken bilim saıysy bıyl Reseıde uıymdastyrylady.
QYZYLORDA