Májilis Tóraǵasy Nurlan Nyǵmatýlın Qordaıda oryn alǵan jaǵdaıǵa baılanysty qaza bolǵandardyń otbasyna kóńil aıtyp, zardap shekkenderdiń tezirek saýyǵýyna tilektestik bildirdi, dep habarlady osy palatanyń baspasóz qyzmeti.
Bul týraly ol óziniń Tvıtter paraqshasyna: «Qordaıda qaza bolǵandardyń otbasyna kóńil aıtamyn jáne zardap shekkenderdiń saýyǵýyn tileımin. Jaǵdaı el basshylyǵynyń baqylaýynda. Bir top májilismen Úkimettik komıssııamen birge oqıǵa ornynda jumys isteýde. Bizdiń maqsatymyz – arandatýǵa jol bermeı, turaqtylyqty saqtaý», dep jazdy.
Nurlan Nyǵmatýlın óz pikirinde bizdiń halqymyz ejelden tatýlyq pen turaqtylyqty, bereke men birlikti maqsat etken el ekenin, bizdiń egemen elimiz de táýelsizdik alǵan kúnnen bastap yntymaǵy jarasqan, qazaqstandyq damý jolyn qalyptastyrǵan abyroıly memleketke aınalǵanyn atap ótti.
Sonymen birge, Májilis Tóraǵasy búginde Qazaqstannyń beıbitshilik pen tatýlyq saıasaty álemniń kóptegen eli úshin úlgi sanalatynyn alǵa tarta kelip, qazaqstandyqtardy eldiń tutastyǵyna nuqsan keltiretin kez kelgen bereketsizdikke jol bermeýge shaqyrdy.
N.Nyǵmatýlınniń pikirinshe, keń baıtaq Qazaqstanymyzdyń árbir azamaty, árbir aımaǵy – bizdiń baǵa jetpes baılyǵymyz. Olardy kózdiń qarashyǵyndaı saqtap, qorǵaý – árbir azamattyń qasıetti boryshy.