Qazaqstan Prezıdenti Qasym-Jomart Toqaev qaýipsizdik jónindegi 56-shy Mıýnhen konferensııasynyń aıasynda Ekonomıkalyq yntymaqtastyq jáne damý uıymynyń Bas hatshysy Hose Anhel Gýrrıamen kezdesý ótkizdi.
Taraptar Qazaqstan men Ekonomıkalyq yntymaqtastyq jáne damý uıymy arasyndaǵy baılanystardyń qazirgi ahýaly men damý perspektıvalaryn talqylady.
Qasym-Jomart Toqaev Qazaqstannyń Ekonomıkalyq yntymaqtastyq jáne damý uıymynyń standarttaryn engizýge, saıası jáne ekonomıkalyq reformalardy júzege asyrý barysynda atalǵan bedeldi uıymmen belsendi yqpaldastyqty jalǵastyrýǵa basa mán beretinin aıtty.
Ekonomıkalyq yntymaqtastyq jáne damý uıymynyń Bas hatshysy Qazaqstanmen aradaǵy kóp jylǵy tabysty yntymaqtastyǵyn joǵary baǵalady. Hose Anhel Gýrrıa Qasym-Jomart Toqaevtyń bıylǵy 24 qańtardaǵy Qazaqstan Úkimetiniń keńeıtilgen otyrysynda sóılegen sózine erekshe mán berip, onda Ekonomıkalyq yntymaqtastyq jáne damý uıymynyń usynystary men keńesteri eskerilgenin aıtty.