2020 jyldyń 1 maýsymynan bastap Air Astana Almaty men Mýmbaı qalalary arasynda turaqty reısin iske qosady. Reıster dúısenbi, seısenbi, beısenbi jáne senbi kúnderi Airbus A320 ushaqtarymen oryndalady. Bul týraly Air Astana áýe kompanııasynyń baspasóz qyzmeti habarlady.
Áýe kompanııasynyń jazǵy kúntizbesine sáıkes, dúısenbi men seısenbi kúnderi Almatydan ushaq jergilikti ýaqyt boıynsha 07:05 ushyp, Mýmbaı qalasyna 11:05 jetip qonady. Qaıtar reıs Mýmbaıdan 12:05 ushyp, Almatyǵa 16:55 qonady. Beısenbi men senbi kúnderi Almatydan 22:10 ushyp, Mýmbaıdan qaıtar reıs erteńine jergilikti ýaqyt boıynsha 03:10 oryndalady. Eki baǵytqa da ushý ýaqyty - 4,5 saǵat.
Bıletterdi airastana.com saıtynda brondap, satyp alýǵa bolady. Baryp-kelýge ekonom-klass bıletterin 150 000 teńgeden bastalatyn arnaıy promo-tarıfpen alýǵa bolady. Bılet baǵasy tarıf túrine jáne bıletti satyp alý kezindegi valıýta baǵamyna táýeldi. Naýqan 31 naýryzǵa deıin jalǵasady.
Mýmbaı Air Astana turaqty túrde qatynaıtyn Úndistannyń ekinshi qalasy bolmaq. Áýekompanııa Úndistan astanasy Delıge 2004 jyldan beri qatynaıdy.