Qyzylorda qalasy ákimdiginiń uıymdastyrýymen A.Toqmaǵambetov atyndaǵy mádenıet úıinde Altyn Ordanyń 750, Abaı Qunanbaevtyń 175 jyldyǵyna arnalǵan «Uly dalanyń ulaǵaty» atty respýblıkalyq aqyndar aıtysy ótti.
Dástúrli ónerdiń baıraǵyn bıik kótergen Syr jerindegi sóz alamany qalalyq jastar teatry ártisteriniń qoıylymymen ashyldy. Sahna tórine belgili aıtys aqyndary Bekarys Shoıbekov, Dıdar Qamıev, Rústem Qaıyrtaıuly, Nurmat Mansurov, Dıdar Apbasov, Birjan Baıtýov, Muradym Meıirlanov, Erjeńis Ábdıev, Erjan Ámirov jáne bolashaǵynan zor úmit kúttiretin jas aqyn Beksultan Orynbasarov kóterildi. Qala ákimi Nurlybek Nálibaev bıylǵy Volonterlar jylyna baılanysty eriktiler aıtysy túrinde ótetin dúbirli dodaǵa qatysatyn júırikterge sáttilik tiledi.
Kil júırik baq synaǵan dúbirli dodany «Altyn dombyranyń» eki márte ıegeri, jýyrda ǵana Nur-Sultan qalasynda ótken «Adamzattyń alyby – hákim Abaı» atty respýblıkalyq aıtystyń bas júldesin Syrǵa alyp kelgen Muhtar Nııazov júrgizip otyrdy. Sóz saıysyna belgili jyraý, Qazaqstannyń eńbek sińirgen qaıratkeri Almas Almatov, aqyn, memlekettik «Daryn» jastar syılyǵynyń ıegeri, Qazaqstannyń eńbek sińirgen qaıratkeri Dáýletkereı Kápuly men aqyn, Qazaqstan Jazýshylar odaǵynyń múshesi Dúısenbek Aıashuly qazylyq jasady.
Alǵashqy juptyń sóz qaǵystyrýy shashyrańqylaý shyqqanymen, odan keıin sahnaǵa kóterilgen tarazdyq Dıdar Apbasov pen jergilikti aqyn Beksultan Orynbasarov sóz saıysyn shırata tústi. Al byltyrǵy «Altyn dombyra» saıysynyń bas júldesin alǵan semeılik Rústem Qaıyrtaı men qyzylordalyq Erjeńis Ábdıevtiń aıtysy kórermenniń aıyzyn qandyrdy.
Osydan keıin shyqqan juptar da adamzat aqyl-oıynyń bıiginde turǵan ál-Farabıdi álem tanyǵanmen ózimiz áli tolyq bilip bolmaǵanymyzdy, Altyn Ordadaı memleket qurǵan babalar amanatyna adaldyqty, artynda «О́lmeıtuǵyn sózi, óshpeıtuǵyn shamy» (Rústem Qaıyrtaı) qalǵan uly Abaı murasyn jer júzine tanytý kerektigin jyrǵa qosty. Odan bólek, aqyndar aýzymen qazirgi qoǵamdaǵy kúıip turǵan ótkir máseleler de aıtyldy.
Qazylar alqasynyń sheshimimen sóz alamanynyń bas júldesin Rústem Qaıyrtaı enshilese, I oryn qyzylordalyq Erjeńis Ábdıevke buıyrdy. Qalǵan eki oryndy qaraǵandylyq Dıdar Qamıev pen Túrkistan oblysynan kelgen Bekarys Shoıbekov ózara bólisti.
Qyzylorda