Qazirgi tańda «Baıqońyr» aýdanynda sý astynda qalýy múmkin 12 ýchaskede 453 turǵyn úı bar. Tótenshe jaǵdaı týyndasa, tamaqtandyrý jáne ýaqytsha ornalastyrý pýnktteri daıyndaldy. Bul týraly qala ákimdiginiń resmı saıty habarlady.
Aldaǵy kúnderi aýa temperatýrasy kóterilip, qar erıdi dep kútilýde. Osyǵan baılanysty «Baıqońyr» aýdanynyń ákimdigi kúsheıtilgen rejımde jumys isteıdi. Aýdan basshysy Nurbol Nursaǵatovtyń tapsyrmasymen jedel shtab quryldy.
Tótenshe jaǵdaı oryn alǵan jaǵdaıda turǵyndar táýlik boıy 55-73-76, 55-73-78 telefondary boıynsha «Baıqońyr» aýdany ákiminiń apparatyna, sonymen qatar +7 (701) 999-85-75 telefony boıynsha Kırpıchnyı, Kazgorodok turǵyn alaptary boıynsha ákimniń bas ınspektory Toqtar Hasenovqa jáne +7 (702) 818-11-88 telefony boıynsha О́ndiris turǵyn alaby boıynsha ákimniń bas ınspektory Darhan Seıithanovqa habarlasa alady.
Qazirgi kezde kóktemgi sý tasqynynyń aldyn alý maqsatynda jeke sektordaǵy qardy tazalaý, shyǵarý jumystary úsh aýysymmen júrgizilip jatyr.
Kún saıyn sý deńgeıin tómendetýge arnalǵan aryq-naýa júıeleri tazartylady, sý basý qaýpi bar 39 jeke menshikti úıde qajet bolǵan jaǵdaıda stasıonarlyq sorǵy stansııalary ornatylady. TJD jáne aýdan ákimi apparatynyń qyzmetkerleri sý basý qaýpi bar problemalyq ýchaskelerde turaqty túrde tekserý jumystaryn júrgizedi. Sondaı-aq jergilikti turǵyndar arasynda qaýipsizdik erejelerin túsindirý jumystary qolǵa alyndy.