Fýtboldan Qazaqstan quramasy burnaǵy kúni túnde elordadaǵy «Astana-Arena» sport kesheninde Grýzııa komandasymen joldastyq kezdesý ótkizip, 1:0 esebimen jeńiske jetti.
Qazaqstan — Grýzııa 1:0 (1:0)
Tóreshi: Sergeı Sınkevıch (Belarýs).
Qazaqstan: Sıdelnıkov (Mokın, 46), Mýldarov (Gýrman, 46), Kıslısyn, Nurdáýletov, Dmıtrenko, Jumasqalıev (Baıjanov, 78), Bogdanov, Shomko (Iýrın, 90), Hıjnıchenko (Ostapenko, 62), Korobkın, Shetkın (Engel, 69).
Grýzııa: Revıshvılı, Kashııa, Hızanıshvılı, Amısýlashvılı, Grıgalava, Kobahıdze, Kankava, Okrıashvılı, Targamadze, Ananıdze, Sırbıladze
Gol: Hıjnıchenko (17).
Jasyratyny joq, buǵan deıingi birneshe oıyndy qatarynan sátsiz aıaqtaǵan Qazaqstan quramasy oıynshylarynyń bul joly tabysty oınaı qoıatynyna jankúıerlerdiń kópshiligi onshalyqty sene qoıǵan joq. Osy matchta komanda taǵy jeńiliske ushyrasa, ózine degen senimniń de selkeýi birjolata setinep ketetinin bas jattyqtyrýshy Mıroslav Beranek te jaqsy bildi. Sondyqtan ol kezdesýde qalaıda betburys jasaýǵa baryn saldy.
Al matchtyń bastapqy jaǵy qazaqstandyqtar úshin bul joly da jaqsy nátıje kútip jatýdyń qur áýreshilik bolatynyn alǵa tartqandaı bolyp kórindi. Kezinde «keńestik brazılııalyqtar» degen at alǵan grýzınder shynynda da ózderiniń oınaý tehnıkasyn jaqsy meńgergenderin tanytyp, kópke deıin dopty bizdiń baǵlandarǵa ustata qoımady. Sol senimdiliktiń súrleýinde olar birneshe ret qaqpaǵa da dop baǵyttap úlgerdi. Sonyń ishinde Aleksandr Kobahıdze urǵan dop qaqpashy Andreı Sıdelnıkovti bir silkindirip ótti.
Bizdiń jerlesterimiz qarsy jaqqa birinshi shabýyldy tek 15-mınýtqa qaraı ǵana jasaı aldy. Aıyp alańynyń ishine ekpindeı kirgen Sergeı Hıjnıchenko urǵan dop bul joly golkıper Nýkrı Revıshvılıdiń qolynan tabyldy. Alaıda, osynyń artynsha qaıta jasalǵan shabýyl tusynda Sergeı múlt ketpedi. Aıyp alańynda dop qabyldap alǵan qaraǵandylyq jigit kenet kilt buryldy da, dopty qaqpaǵa qaraı shirene tartty. Gol! Úsh baǵannyń aıasyna qaraı zýyldap ushqan dop torǵa baryp qadala qaldy.
Myna sátsizdikten keıin meımandar taǵy yshqyndy. Olardyń jappaı alǵa umtylǵan joıqyn joryǵy barysynda Kobahıdze bir ret basymen qaqpaǵa dop baǵyttady. Al Jano Ananıdzeniń alystan atqylaǵan doby nysanadan qıys ketti. Sonyń artynsha buryshtama berilip, odan ushqan dopty Zýrab Hızanıshvılı qaqpaǵa dóp túsirýge umtyldy. Biraq bul da Andreı turǵan sheńberdiń ústinen zý ete tústi. Osydan keıin shabýyl da birtindep báseńsı berdi.
Kezdesýdiń ekinshi bóligi taǵy da grýzınderdiń shabýylymen bastaldy. Aldymen Revıshvılı ózine kelgen dopty ala qashty. Ol aıyp alańy mańyna kele bergende Alekseı Shetkın qaýiptiń betin qaıtaryp úlgerdi. Munyń sońyn ala qonaqtar aıyp dobyn urdy. Ony matchtyń ekinshi bóliginde alańǵa shyqqan darbazashy Aleksandr Mokın sheberlikpen qaıtardy. Osydan bastap, grýzınderdiń buryshtama dobyn berýleri de jıileı berdi. Solardyń qaı-qaısysy bolsa da, qaýip tóndirip turdy. Bir jaqsysy, bizdiń qorǵanys shebindegi jigitter bul tusta óte muqııat oınady.
Sol aralyqtarda shabýylshylarymyz da ózderiniń alańǵa bosqa shaqpaǵandaryn kórsetip qoıdy. Aıtalyq, Sergeı Ostapenkonyń jeke-dara shabýylyn grýzın qorǵaýshylaryn jandaryn salyp baryp qana keıin serpiltti. Osylaısha kezdesýdiń sońǵy jaǵy alma-kezek shabýylmen ótip jatty. Degenmen, bul oıynda qonaqtardyń dopqa kóbirek ıelik etkenderin de, qaqpaǵa artyǵyraq urǵandaryn da, standartty jaǵdaıǵa molyraq tap bolǵandaryn da aıta ketýimiz kerek. Osyndaı tartysty kezdesýdiń 1:0 esebimen bizdiń qurama paıdasyna sheshilgeniniń ózi dátke qýat.
Endigi bir aıta ketetin jáıt, buǵan deıin bul eki qarsylas 2 ret kezdesken bolatyn. 2005 jylǵy tamyzdyń 17-sinde Almatyda ótken birinshi oıynda qonaqtar 2:1 esebimen jeńiske jetti. Al 8 qazanda Tbılısıde ótken qarymta oıyn 0:0 esebimen teń aıaqtaldy. Sonymen, úshinshi oıynda qazaqstandyqtar jeńis sanyn da, dop aıyrmashylyǵyn da teńestirip otyr.
Rýslan Igilik.