Bıyl respýblıkanyń qazirgi qoldanystaǵy Konstıtýsııasy qabyldanǵanyna 25 jyl tolady. Osy ataýly data qarsańynda Aqtóbe qalasynda ǵylymı-tájirıbelik konferensııa ótkizilip, oǵan Parlament májilisiniń depýtattary men Konstıtýsııalyq keńestiń músheleri jáne birqatar elimizge tanymal ǵalymdar, sondaı-aq ádilet, quqyq qorǵaý organdarynyń jetekshileri qatysty.
Tipti Qazaqstannyń irgeli aımaǵynyń birinde ótkizilgen konferensııaǵa kórshiles Reseıden de arnaıy kelgender boldy. Ata-Zańymyzdyń el ómirindegi atqaratyn baǵa jetpes mańyzy men róli jóninde aıtylǵan oı-pikirler men tujyrymdardyń basty jelisi tómendegishe órbidi.
Qaı memlekette de onyń árbir azamatynyń erik-jigeri men tańdaýy sol eldiń basty Zańy aıasynda júzege asady. Bul tujyrymnyń elimizdiń Ata-Zańyna da tikeleı qatysy bar. Konstıtýsııa qaǵıdattary saqtalǵan, aıaqqa basylmaǵan, qurmettelgen ári udaıy nazarda bolǵan memlekette ǵana saıas turaqtylyq pen berik ahýal ornyǵa alady. Elimizdiń qazirgi saıası-ekonomıkalyq damý deńgeıi osyndaı saıası qundylyqtarǵa sáıkes kele alady. Munyń basty arqaýy respýblıkanyń 1995 jyly qabyldanǵan Konstıtýsııasynan tamyr tartady. Elimizdiń basty Zańynyń memleket pen qazaqstandyq qoǵamnyń damýyndaǵy laıyqty orny men róli qashanda joǵary.
Qazirgi kezde QR Konstıtýsııasy barlyq ulttyq qundylyqtar men azamattyq qadir-qasıettiń negizine aınala alǵany anyq. Sonymen birge basty Zań memlekettiliktiń bastaýy men birtutastyǵynyń qaınar kózi retinde de ornyǵyp keledi. Ata-Zańymyzdyń bılik pen halyq arasyn jaqyndata túsý jónindegi atqaratyn róli de solǵyn tartyp kórgen emes. Qazir respýblıkamyzda ony turaqtylyq pen demokratııa kepili retinde qabyldaıtyn azamattardń qatary jyldyn-jylǵa ósip keledi. Sondaı-aq elimizdiń tynys-tirshiligine óreli ózgerister ákele bilgen 1995 jyly qabyldanǵan Qazaqstan Konstıtýsııasynyń qurylymy men jobasy qalaı ázirlengeni de el azamattarynyń jadynda júrse, munyń eshqandaı artyqshylyǵy bolmas edi. Konferensııa kezinde bul másele jóninde de tanymdyq áseri mol áńgimeler qozǵalǵany da basqosýdyń mazmunyn odan ári kótere túskendeı áser qaldyrdy. Iаǵnı bul jáıtti bir aýyz sózben túıindesek, osynaý asa jaýapty kezeńde álemniń 20 dan astam Konstıtýsııalarynyń nusqalary qarastyrylyp, onyń eń ozyq tıimdi degen tustary Ata-Zańymyzdy qurylymdaý kezinde nazarǵa alynǵany da atap aıtýǵa turarlyqtaı.
Mine, osylaısha arada 25 jyl ótken kezde tól Konstıtýsııamyzdyń basty Erejeleri men tarmaqtary aıasynda azamattardyń elimizde ómir súrý men eńbek etý jáne dem alý men densaýlyqtaryn kútý sapasy áldeqaıda jaqsara túskeni kámil. Sonymen birge osy ýaqyt aralyǵynda ultqa paıdasyn tıgize alatyndaı tıimdi ekonomıka tetikteri jasaqtalyp, demokratııalyq qoǵamnyń negizderi qalanǵany da Ata-Zańymyzdyń tıgizgen shapaǵaty deýge tolyq negiz bar. Sóıtip Aqtóbe ótkizilgen keń tynysqa toly konferensııa respýblıka Konstıtýsııasynyń mundaı artyqshylyqtary men erekshelikterin egjeı-tegjeıli tarqatyp berdi.