Elbasy N.Á.Nazarbaev óziniń «Bolashaqqa baǵdar: rýhanı jańǵyrý» maqalasynda tarıhı muralarymyzdy keńinen nasıhattaý máselesine erekshe mán bergeni belgili.
Ásirese ulttyń tereń tarıhynan bastaý alatyn mádenı-rýhanı qundylyqtardy saqtaı otyryp, ony óskeleń urpaqqa jetkizýge aıryqsha den qoıylǵan. Osy maqsatta jyl saıyn Baızaq aýdandyq tarıhı-ólketaný mýzeıinde «Mýzeıge syı» aksııasy uıymdastyrylady. Atalǵan aksııa bıyl da jalǵasyn tabýda ári oǵan ún qosýshylar da barshylyq.
Jýyrda murajaı qory taǵy da birneshe jádigermen tolyqty. Atap aıtar bolsaq, Kópterek aýyldyq okrýgine qarasty Keńes aýylynyń turǵyny Aıat Ábildaev mýzeıge óz qolymen jasaǵan at ábzeli – er toqym men alty órimdi qamshyny syıǵa tartty.
Birneshe jyldan beri kópshiliktiń tapsyrysymen er toqym, júgen, aýyzdyq, shylbyr, qamshy taǵy basqa jabdyqtardy jasap, halqymyzdyń qazynaly ónerin damytyp otyrǵan qolónershi bul buıymdaryn murajaıǵa syılaýdy jón kóripti.
– «Áý bastan-aq ata-baba turmysy jylqy malymen tikeleı baılanysty bolǵandyqtan, onyń buıym-jabdyqtaryn jasap, paıdalaný da ózindik óner sanalady. Bul isti janyma serik etkenime birneshe jyl boldy. Mundaı turmystyq buıymdar keıingi urpaq úshin asa baǵaly mura bolady dep esepteımin. «Mýzeıge syı» aksııasy jóninde basylym betinen habardar bolyp, men de óz úlesimdi qosýym kerek dep sheshtim. Bul árbirimizdiń azamattyq paryzymyz, – deıdi Aıat Aqjoltaıuly.
Al biz óz kezeginde sheberge úlken alǵysymyzdy bildire kele, onyń qolynan shyqqan er toqym men qamshyny mýzeıdiń etnografııa zalyna ornalastyryp, halqymyzdyń at ábzelderin ustap-tutynýdaǵy maqsat-múddelerin mýzeı kelýshilerine túsindirýdemiz.
Aıdana ShOTBASOVA,
Baızaq aýdandyq tarıhı-ólketaný mýzeıiniń qor saqtaýshysy