Aqtóbe aımaǵynda shaǵyn jáne ortasha bıznesti damytý isinde keshendi sharalar belgilengen. Osy arqyly quny joǵary sapaly taýar óndirý isi qolǵa alynǵan. Bul baǵytta jergilikti kásipkerler shyǵarǵan kópshilik qoldy taýarlar kórmesin ótkizý ári onyń sońyn forýmǵa ulastyrý utymdy da tıimdi joldardyń biri retinde tańdalǵan. Kásipkerlik kókjıegin kóterýdi kókseıtin mundaı basqosýlar jergilikti taýar óndirýshiler men iri tutynýshylar arasyndaǵy tikeleı baılanystardy tereńdete túsýge yqpalyn tıgizbek.
Osy oraıda bıylǵy naýryz aıynyń alǵashqy on kúndiginde «Aqtóbe ónimderi - 2020» atty taqyrypta ótkizilgen jergilikti taýar óndirýshiler kórmesiniń aýqymy meılinshe keń bolǵany atap aıtýǵa turarlyq is. Oǵan óńirdegi qurylys materıaldary kıim-keshek jáne azyq-túlik ónimderin óndiretin qyryqtan astam kásiporyn qatysyp óz taýarlaryn kópshiliktiń nazaryna usyndy.
Joǵaryda aıtylǵandaı atalmysh kórmeniń sońy forýmǵa jalǵasyp, munda shaǵyn jáne ortasha bıznestiń damý perspektıvalary talqylanǵany da ony mazmun jaǵynan baıyta túskendeı áser qaldyrdy. Oǵan Reseıdiń Orynbor oblysyndaǵy kásipkerlerdiń quqyǵyn qorǵaý jónindegi ýákil Vıktor Korshýnovtyń arnaıy kelip qatysýy da kórme-forýmnyń órisin ósire tústi deýge ábden bolady. Sonymen birge osy irgeli jıynda Kásipkerler palatasy kásipkerlerdiń quqyn qorǵaý jáne sybaılas jemqorlyqqa qarsy is-qımyl jónindegi keńestiń tóraǵasy Esimhan Qurmanǵozın Aqtóbedegi oń bastamalarǵa qoldaý bildirdi.
Budan ári «Atameken» óńirlik kásipkerler palatasynyń dırektory Anar Dárjanova buǵan deıin atqarylǵan jumystarǵa toqtala kelip, oblysta alpys myńǵa jýyq shaǵyn jáne orta kásiporyn sýbektileri jumys jasaıtynyn alǵa tartty. Onyń aıtýynsha ótken 2019 jyly «Bıznestiń jol kartasy - 2020» baǵdarlamasy boıynsha palata ókildiginiń qoldaýyna sáıkes 256 shaǵyn jáne ortasha bıznes sýbektileri ashylǵan. Soǵan saı jalpy somasy 870 mıllıon 364 myń teńgege jetpis eki jańa joba júzege asyrylǵan. Sonymen birge bıznes – keńesshi» jobasyna sáıkes 1069 adam oqyǵan. Buǵan qosa «Bıznes ósý» baǵdarlamasy boıynsha júzdegen adam jańa mamandyqtarǵa beıimdelgen.
Árıne munyń bári jaǵymdy jaıt. Oń qubylys ekeni anyq. Áıtse de óńirde jergilikti qamtýdyń áleýeti men múmkindigi áli de bolsa tolyq paıdalanylmaı otyrǵanyn jasyryp qalýdyń eshqandaı jóni joq. Atap aıtqanda buǵan deıin júrgizilgen birqatar taldaýlar men zertteýler keıbir jergilikti memlekettik organdardyń áli kúnge deıin ımporttalǵan taýarlardy satyp alyp júrgenin kórsetedi. Mundaı kórinis Aqtóbe aımaǵynda dál sol tektes ónimdi sapaly óndiretinder bar jaǵdaıda oryn alyp otyrǵanyn eskersek, mundaı tájirıbeni qoldaý qoıý qıyn-aq.
Búgingi kúni jergilikti qamtý úlesi ortasha eseppen alǵanda elý paıyzǵa jetpeı júrgeni osyndaı nemkettilik pen enjarlyqtyń saldary bolsa kerek. Sonymen birge jergilikti qamtý úlesi máselesine qatysty alǵanda tamaq jáne jeńil ónerkásip ónimderi men qurylys materıaldary sekildi taýar túrleri kem degende toqsan paıyzdy quraýy kerektigi de eshqandaı talas týǵyzbaıdy. Jergilikti atqarýshy organdar tarapynan ınfraqurylymdyq júıelerdi qalyptastyrý men ındýstrııalyq aımaq aýmaǵyna jer telimderin berý jónindegi máseleler túbegeıli sheshim tapqan jaǵdaıda bul olqylyqtardyń orny tolatynyna senim mol.
Aqtóbe oblysy