Respýblıkalyq joba aıasynda uıymdastyrylǵan «Tulpar minip, tý alǵan!» baıqaýyna oblystyń ár aýdanynan kelgen 6-10 synyp oqýshylary qatysty. Talapkerler baıqaýdyń birinshi kezeńinde «Qobylandy batyr» jyrynyń Marabaı jyraý nusqasyn jatqa aıtyp jarysty. Ojan keıin jyrda kezdesetin tarıhı, kónergen sózder men jer-sý ataýlarynyń mán-maǵynasyn ashyp, halyq aýyz ádebıeti boıynsha aldyn ala ázirlengen vıktorınalyq suraqtarǵa jaýap berdi.
Baıqaýǵa Serikbaı Ospanov, Aqylbek Shaıahmet syndy belgili qalamgerler qazylyq etti. Saıys qorytyndysy boıynsha birinshi oryndy Arqalyq qalasyndaǵy Sh. Ýálıhanov atyndaǵy №1 orta mekteptiń 6-synyp oqýshysy Qarakóz Dalabaı jeńip aldy. Ekinshi oryn Rýdnyıdan kelgen B. Maılın atyndaǵy №7 mektep-gımnazııanyń 8-synyp oqýshysy Nursıla Ádebovaǵa buıyrdy. Úshinshi oryndy Amangeldi aýdanynyń 6-synyp oqýshysy Jantóre Tólebaı aldy. Baıqaý jeńimpazdary men olardy daıyndaǵan ustazdar bilim basqarmasynyń aqshalaı syılyqtary men maqtaý qaǵazdaryna ıe boldy.
Marabaı jyraý nusqasyndaǵy «Qobylandy batyr» jyry 132 betten, 5206 joldan turady. Muny jattap, jadyǵa toqý, ondaǵy túsiniksiz sózder men jer-sý ataýlaryna, tarıhı uǵym-túsinikterge etnolıngvıstıkalyq taldaý jasap, túsindirip berý ońaı sharýa emes. Oqýshylardyń kóbi joǵary deńgeıde daıyndalyp kelgen. Buǵan deıin Qostanaı oblysynda mundaı baıqaýlar bolǵan joq. Bıyl tuńǵysh ret uıymdastyrylyp otyr. Igi bastama budan ári jalǵasýy tıis. О́ıtkeni bul jas urpaqtyń aýyz ádebıetimizdiń qaınar bastaýlarynan tereń sýsyndap ósýine yqpal etedi, - deıdi qazylar alqasynyń múshesi, aqyn Serikbaı Ospanuly.
Qostanaı