Qazirgi kezde Memleket basshysy Qasym-Jomart Toqaevtyń tapsyrmasyna sáıkes latyn qarpine negizdelgen qazaq tili álipbıiniń jańa nusqalaryn ǵylymı turǵydan qaıta saraptaý jumystary júrgizilýde. Búgingi kúni keleshegi kemel is ashyq jalpyhalyqtyq talqylaý arnasyna qaraı baǵyt alyp keledi.
Mundaǵy basty maqsat – jańa álipbıdiń kem ketigin ekshep, odan ári jetildire túsý bolyp otyr. Osy oraıda respýblıka deńgeıinde onyń birneshe nusqalary qarastyrylyp, sonyń ishinde eń yńǵaıly ári eń utymdy dep tanylǵan úsh joba bıylǵy 2020 jylǵy aqpan aıynda jalpyrespýblıkalyq ashyq talqylaýǵa usynylǵany málim.
О́z zamanynda latyn álipbıin qoldaǵan qazaqtyń belgili lıngıvıst-ǵalymy Qudaıbergen Jubanovtyń kishi otanynda bul máselege qatysty uıymdastyrylǵan basqosýlar qyzý pikir-talastarǵa negiz bola bildi. Buǵan Aqtóbe oblysynyń tilderdi damytý basqarmasy janyndaǵy tilderdi oqytý ortalyǵynyń mamandary jáne fılolog-ǵalymdar men mektep muǵalimderi qatysyp, óz oı-pikirlerin ortaǵa saldy.
Tıisti taldaýlar men saraptaýlar barysynda jańa álipbıdiń orfografııalyq, ádistemelik jáne termınologııalyq qyrlarynyń keıbir túıtkilderi jóninde utymdy usynystar aıtyldy. Bul oı-tujyrymdar birlesken jumys toptarynyń ortaq otyrysynda qoldaý tapty. Munda jetildirilgen álipbı jobasynyń eń basty arqaýlary taldaýlar nysanyna aınalyp, tańbalardyń ǵylymı negizdemesi men áripterdiń pernetaqtadaǵy ornalasý júıesin odan ári jetildire túsý jóninde baıypty áńgimeler qozǵaldy.
Talqylaýlar kezinde mektep muǵalimderi jetildirilgen álipbı jobasyn maquldap, buǵan qatysty ózderiniń oń kózqarastaryn bildirdi. Ras, atalǵan joba ázirge qoldanysqa engizile qoıǵan joq. Sondyqtan buǵan qatysty úzildi-kesildi pikir aıtýdyń ózi sál asyǵystaý da bolatyn shyǵar. Bul úshin birinshi kezekte latyn grafıkasyna negizdelgen qazaq tiliniń jańa álipbı jobasynyń ómirsheńdigi men básekege qabilettiligin qoldanysta dáleldeý delinetin asa jaýapty mindet tur. Tek sonda ǵana jańa álipbı memleket pen qoǵamdaǵy óz ornyn taba alady. «Endigi kezek jazý daǵdysynda» – desti olar.
Aqtóbede ótkizilgen talqylaýlar qorytyndasy boıynsha aıtylǵan usynystar men pikirler Ulttyq komıssııa janyndaǵy jumys toptarynyń birlesken Keńesine joldandy.