Gazetimizdiń 3 aqpandaǵy sanynda «Saýatsyz polısııa hattamany qalaı toltyrady?» degen maqala jaryq kórgen bolatyn. Onda Shymkent qalasynyń mamandandyrylǵan ákimshilik sotynyń tóraǵasy Ábdimútálip Bekturǵanovtyń brıfıngte bergen aqparatyna súıenip, shymkenttik polısııa ókilderiniń hattamany elektrondy túrde durys toltyra almaı, túrli qatelikterge boı aldyrǵandyǵyn tilge tıek etken edik.
Tarqatyp aıtar bolsaq, ákimshilik hattamany jazý barysynda tártip saqshylary ákimshilik quqyq buzýshylyq týraly zańnyń baptaryn jazǵanymen, ishki tarmaqtaryn kóbine ashyp jaza bermegen. Osylaısha zań tarmaqtarynan shatasyp nemese adamdardyń aty-jónin durys kórsetpegen. Tipti ýchaskelik ınspektor da, jol-patrýldik polısııa qyzmetkeri de elektrondy hattamada óz aty-jónin zorǵa jazatyn kórinedi. Ábdimútálip Elikbaıulynyń sózine súıensek, bul olqylyq quqyq buzýshylyqty zań turǵysynan durys baǵamdaýǵa keri áserin tıgizip, saldarynan sot barysynda ákimshilik isti qaıta saralaýǵa májbúr etýde.
Jýyrda tipti elektrondy planshetti durys paıdalana almaǵan shymkenttik polıseıler ońaı oljaǵa kenelýdiń jolyn izdep qyzmettik quraldaryn lombardqa ótkizip jibergen. Bul quqyq buzýshylyq týraly málimet Shymkent qalalyq ishki qaýipsizdik dıreksııasynyń eks-kapıtanyna qatysty sot prosesi kezinde belgili boldy.
Bir qyzyǵy, qyzmettik gadjetterdiń joǵalǵany anyqtalyp, tergeý júrgizilgenimen eshkim jumystan shyǵarylmaǵan. Qylmystyq is qozǵalyp, keıinnen «qylmystyq quqyq buzýshylyqtyń anyqtalmaǵany úshin» jabylǵan.
Biraq polısııa bólimi lombardqa árqaısysy 185 myń teńge turatyn alty planshettiń ótkizilgenin rastap otyr. Sonda «bul planshetter lombardqa ózdiginen barǵan ba?» degen kúlkili suraq týyndaıdy…
Shymkent qalalyq IIB jeke qaýipsizdik bóliminiń qyzmetkeri F.Sháripbaıulyna qatysty sot prosesi kezinde lombardqa ótkizilgen gadjetterdiń jaıy aqyry ashylǵan. Aıyptalýshy paramen ustalǵan kezde ondaǵan planshettiń joǵalyp ketýine qatysty tergeý júrgizilip jatqanyn aıtqan.
Esterińizge salar bolsaq, F.Sháripbaıuly úlken kólemde para alǵany úshin ustalǵan bolatyn.
Jalpy, Shymkent qalalyq PB qyzmettik paıdalaný úshin 259 mln 370 myń teńgege barlyǵy 1402 planshet satyp alǵan. Al lombardqa ótkizýdi uıǵarǵan patrýldik polısııa polkine qyzmettik qoldanysqa 680 planshet berilgen.
Búginde shymkenttik polısııa qyzmetkerleriniń jumysyna syn aıtýshylardyń qatary kóbeıip keledi. Buǵan birinshi kezekte sala mamandarynyń jumysqa nemquraıdylyǵy áser etse kerek. Osydan biraz buryn «Samal» shaǵyn aýdany turǵynynyń úıinde urlyq faktisi oryn alǵan. Polısııaǵa habarlasqan jábirlenýshige: «Aryz jazǵanmen, báribir, joǵalǵan zattaryńyz tabylmaıdy», dep qysqa qaıyrypty.
Osylaısha, polısııa qyzmetkerleri qoǵam tártibin saqtaý, turǵyndardyń qaýipsizdigin qamtamasyz etý basty mindeti ekendigin esten shyǵaryp alyp jatqandaı...
ShYMKENT