Prezıdent janyndaǵy Ortalyq kommýnıkasııalar qyzmetinde ótken brıfıngte Qazaqstannyń Bas sanıtarlyq dárigeri Jandarbek Bekshın koronavırýs Eýropa elderinde tez tarap jatqanyn aıtyp, saqtyq sharalarynyń kúsheıe túsetinin jetkizdi.
Buǵan deıin Qytaı, Iran, Ońtústik Koreıa koronavırýs boıynsha qaýipti elderdiń 1 «A» sanatynda bolsa, endi olardyń qataryna Italııa qosyldy. Sondyqtan da bul elmen qarym-qatynas 8 naýryzdan bastap shektelgen. «Qytaıda jaǵdaı turaqtanyp keledi. Bul elde aýrýdyń taralýy 0,02 paıyzǵa deıin tómendedi. Biraq bizdi Eýropa elderi qatty alańdatyp otyr. Mysaly, Italııada aýrýdyń kúndelikti ósýi 20 paıyzdan asyp, ólim-jitim boıynsha birinshi orynǵa shyqty. Sondyqtan bul eldi biz eń qaýipti elderdiń 1-sanatynyń «B» tobynan shyǵaryp, «A» tobyna kirgizdik. Budan bólek Fransııa, Germanııa, Ispanııa elderinde de aýrý órship barady. Olar 1 «B» tobyna enip otyr. Bizdiń Eýropamen qarym-qatynasymyz tyǵyz. Sondyqtan otandastarymyz bul elderge saparlaýdy ázirshe josparlamaǵany jón jáne sonda turatyn dos-jaran, tanystaryn shaqyrýdyń qajeti joq», dedi bas sanıtar.
J.Bekshın 1-sanat – «A» tobyndaǵy elderden kelgender eki apta aýrýhanada oqshaýlaýda, al 1-sanat – «B» tobyndaǵy memleketten kelgender 14 kún úı karantıninde bolatynyn eskertti. Sondaı-aq ol 2-sanattaǵy elderdiń qataryna Shveısarııa, Ulybrıtanııa, Nıderland, al 3-sanatqa Belgııa, Shvesııa, Norvegııa, Úndistan, Irak, Fılıppın, AQSh kiretinin atap ótti. «1 «B» jáne 2-sanattaǵy memleketterden kelgender úı karantıninde bolýy tıis. Árbir adam óziniń jáne mańaıyndaǵy týys-týǵan, dos-jarandarynyń densaýlyǵyn oılaýy kerek. Kásiporyn, uıymdardyń basshylary búkil ujymdy qorǵaý úshin 1-2 sanattaǵy elderden kelgen qyzmetkerlerin jumysqa jolatpaýy kerek. Bas sanıtarlyq dárigerdiń qaýlysyn qazaqstandyqtar ǵana emes, elge kelgen ózge eldiń azamattary oryndaýy mindetti» degen J.Bekshın árbir adam jeke gıgıena erejelerin qatań saqtaýy tıis ekenin taǵy bir ret eskertti.
Bas sanıtar qazirgi kezde 703 adamnyń aýrýhanada, 167 adamnyń úı karantıninde jatqanyn, al 2-sanat boıynsha medısınalyq baqylaýda 3019 adamnyń bar ekenin jetkizdi. «Jaǵdaı ár 2-3 kún saıyn ózgerýde. Densaýlyq saqtaý mınıstrligi 6 qańtardan bastap táýlik boıǵy jumys tártibine kóshti. Bul bizge kún saıynǵy jaǵdaıǵa monıtorıng jasap, baqylaýdy kúsheıtý boıynsha jedel shara qabyldaý úshin kerek», degen J.Bekshın elimizde koronavırýs tirkelgen jaǵdaıda birden arnaıy sharalar qolǵa alynatynyn aıtty.
«Barlyq tıisti sharany iske asyryp jatyrmyz. «Sheńber» aıasy tarylyp bara jatyr. Basynda Qytaı eli ǵana edi. Qazir Iran, Ońtústik Koreıaǵa jetip, artynsha Eýropa elderin sharpydy. Infeksııa tirkelgen elderdiń ortasynda qaldyq. Álbette bizge vırýs kirmeıdi dep kepildik bere almaımyz. Vırýs – qamap tastaıtyn «mal» emes. Adam men janýar arqyly juǵa beredi. Kún sáýlesi ony jeńe me, joq pa degen de suraq qoıylyp jatyr. Kún jarqyrap turǵan Irandy qarańyz. Bizdiń mindet – jumyla kirisip, saqtyq sharalaryn kúsheıte berý», dedi ol.