Trektegi velosporttan Qazaqstan komandasy 2020 jylǵy Tokıo Olımpıadasyna úsh joldama jeńip aldy. Berlınde ótken álem chempıonatynan keıin Halyqaralyq velosıpedshiler odaǵy (UCI) jańa reıtıng túzip, Qazaqstan sapynan úsh sportshynyń Olımpıadaǵa qatysatyny anyqtaldy. Osy oraıda, komandadaǵy sprınterlerdiń jattyqtyrýshysy Valentın Savıskıı joldamadan kimderdiń úmitti ekenin aıtty. Bul týraly olympic.kz habarlady.
- Bizge qoldaý kórsetip, jankúıer bolǵan árbir janǵa alǵysymdy bildiremin. О́ıtkeni, bizdiń sportymyz áli de jas. Sprıntten Olımpıadaǵa tarıhı joldama jeńip aldyq. Osy oqıǵaǵa atsalysqandarǵa kóp rahmet. Álem chempıonatyndaǵy eń úlken nátıjelerdiń biri - keırınnen Sergeı Ponomarevtiń altylyqqa engeni. Dál osy kórsetkishtiń arqasynda biz Tokıo oıyndaryna lısenzııa alyp otyrmyz. Sergeı Ponomarev ekeýmiz álem chempıonatynda medalsiz qalǵanymyzǵa áli ókinemiz. О́ıtkeni, júlde alatyn jerimiz edi. Endi bar kúshimizdi Olımpıada oıyndaryna daıyndalýǵa jumsaımyz. Jankúıerlerdi Olımpıada medalimen qýantsaq degen maqsatymyz bar. Osyndaı úlken maqsat qoıyp otyrmyz. Bizdiń sportta lısenzııa sportshyǵa emes, elge beriledi. Sondyqtan, bul joldamaǵa Sergeı Ponomarev, Andreı Chýgaı jáne Pavel Vorjev úmitti. Árqaısysynyń Olımpıadaǵa qatysatyn áleýeti bar, - dedi V.Savıskıı.
Berlındegi álem chempıonatynda Sergeı Ponomarev keırınnen 6-shy oryn alsa, Artem Zaharov omnıým boıynsha alǵashqy ondyqqa endi.