Batys Qazaqstan oblysy Shyńǵyrlaý aýdanynyń ákimi laýazymyna Muhanbetjanova Álııa Bıǵazyqyzy taǵaıyndaldy.
Álııa Muhanbetjanova Batys Qazaqstan oblysy Oral qalasynda 1978 jyly dúnıege kelgen. Batys Qazaqstan memlekettik agrarlyq ýnıversıtetin «agrohımııa jáne topyraqtaný», M.О́temisov atyndaǵy Batys Qazaqstan memlekettik ýnıversıtetin «orys tili men ádebıeti, shet tili» mamandyqtary boıynsha támamdaǵan.
Ár jyldary Batys Qazaqstan oblysynyń Zelenov (qazirgi Báıterek) aýdanynda Kojevnıkov orta mektebiniń muǵalimi, Jer resýstaryn basqarý jónindegi aýdandyq bóliminiń jetekshi mamany, Zelenov aýdany aýyl sharýashylyǵy jáne jer qatynastary bóliminiń jer qatynastary jónindegi bas mamany, Zelenov aýdany jer qatynastary bóliminiń meńgerýshisi, Zelenov aýdanyn jer qatynastary bóliminiń basshysy qyzmetterin atqarǵan. 2014 jyldyń tamyz aıynan bastap búginge deıin Batys Qazaqstan oblysynyń jer qatynastary basqarmasynyń basshysy laýazymynda boldy.
Al buǵan deıin Shyńǵyrlaý aýdany ákimi qyzmetin atqarǵan Erjan Turmaǵambetovtyń bul qyzmetten óz erkimen ketkeni málim boldy.
«2019 jyldyń aıaǵynda Shyńǵyrlaý aýdanynda bilim berý bólimi basshysyna qatysty jemqorlyq faktisi tirkelgen bolatyn. Osy oqıǵalarǵa baılanysty qazirgi aýdan ákimi Turmaǵambetov Erjan Rysjanuly óz erkimen jumystan ketý týraly sheshim qabyldap, ótinishin bildirdi. Oblys ákimi Erjan Rysjanulynyń ótinishin maquldady. Jańa ereje shyqpas buryn bolǵan oqıǵa bolǵanymen, basshy retinde barlyq jaýapkershilikti moıyndaı otyra osyndaı sheshim qabyldaǵan aýdan ákiminiń áreketi – onyń tárbıe kórgen, adamgershiligi jáne basshy retinde jaýapkershiligi mol azamat ekenin kórsetedi. Erjan Rysjanuly tájirıbesi mol memlekettik qyzmetshi. Áli de elge tıgizer paıdasy kóp. Ol kadr rezervinde bolady» delingen Batys Qazaqstan oblysy ákimdigi baspasóz qyzmeti taratqan málimdemede.
Batys Qazaqstan