Bul týraly Eńbek jáne halyqty áleýmettik qorǵaý mınıstri Birjan Nurymbetov Ortalyq kommýnıkasııalar qyzmetiniń alańynda elde engizilgen tótenshe jaǵdaı boıynsha Prezıdent tapsyrmalaryn júzege asyrý taqyrybynda ótip jatqan onlaın baspasóz konferensııasynda aıtty.
«Elimizdegi tótenshe jaǵdaıǵa baılanysty biraz mekeme men kásiporyndar jumysyna shekteý qoıýǵa, keıbireýleri toqtatýǵa májbúr bolady. Osyǵan baılanysty jumysshylardyń jumys isteý rejımi ózgeredi. Osyǵan qatysty búgin men jumys berýshilerdi qyzmetkerler aldynda áleýmettik jaýapkershilik tanytýǵa jáne eńbek zańdylyǵyn saqtaýǵa shaqyramyn. Jumys istep júrgen azamattar óz eńbek quqyqtaryn bilýi qajet» dedi mınıstr.
Osy rette Birjan Nurymbetov qashyqtan jumys isteý tártibin túsindirdi.
«Birinshiden, barlyq kásiporyn, mekemeler qashyqtan jumys isteýge múmkindigi bolsa, sondaı rejımge ótýge mindetti. Eńbek kodeksiniń 138-babyna sáıkes, qashyqtan jumys júrgizgen kezde eńbek aqy tóleý tártibi ózgermeıdi. Bul jerde azamat jumys ornynan emes, úıinen kúndelikti qyzmetin atqarady. Jalaqy ózi aı saıyn alatyn kólemde tólenedi» dep atap ótti Eńbek jáne halyqty áleýmettik qorǵaý mınıstri Birjan Nurymbetov.