Memlekettik qyzmet isteri agenttiginiń tóraǵasy Anar Jaıylǵanova memlekettik apparattyń turaqty jumys isteýin qamtamasyz etý maqsatynda qandaı sharalar usynylǵanyn aıtyp berdi.
- Birinshiden. Ikemdi, qysqartylǵan nemese qashyqtyqtan jumys rejımin qoldaný.
Memlekettik organdarda ıkemdi jumys ýaqytyn qoldaný aǵymdaǵy jaǵdaıda erekshe ózekti bolyp tabylady.
Memleket basshysy atap ótkendeı, «tótenshe jaǵdaı rejıminde qoǵamnyń tirshiligin qamtamasyz etetin, qaýipsizdik pen quqyqtyq tártipti baqylaıtyn mekemelerden, jekelegen BAQ-tan ózge memlekettik, kvazımemsektor qyzmetshileriniń 70%-yn qashyqtan jumys isteýge kóshirgen jón».
Bul memlekettik qyzmetshilerge jumystan qol úzbeı, uzaq demalys kezinde óz balalaryn qaýipsizdendirýge jáne barlyq jaýapty baǵyttarda úzdiksiz jumys isteýin qamtamasyz etýge múmkindik beredi. Budan basqa, osy sharany iske asyrý qoǵamdyq kólikti qosymsha jeńildetýge yqpal etetin bolady, bul COVID-19 jappaı taralýyn boldyrmaýdyń mańyzdy sharttarynyń biri bolyp tabylady.
Memlekettik qyzmetshilerdiń jumys ornynda tikeleı bolýyn talap etpeıtin salalarda qashyqtyqtan jumys rejımin engizgen jón.
Osyǵan baılanysty, ýaqytsha shekteýler kezeńinde ortalyq memlekettik organdar men ákimdikter memlekettik qyzmetshilerdiń mynadaı sanattaryn aıqyndaýlary qajet:
- jumys ornynda mindetti túrde bola turyp, uıymnyń tynys-tirshiligin qamtamasyz etýmen aınalysatyn tulǵalar. Bul rette osy tulǵalardyń qysqartylǵan jumys ýaqyty boıynsha qyzmet etý múmkindigin qarastyrý qajet;
- eńbek fýnksııalaryn qashyqtyqtaǵy jumys rejıminde oryndaıtyn adamdar;
- demalysqa jiberiletin qyzmetshiler.
Joǵaryda kórsetilgen tulǵalardyń jumys sharttary men tártibin osyndaı jumys rejımin qarastyratyn eńbek zańnamasyna sáıkes júzege asyrý qajet.
Qashyqtan jumys isteıtin memlekettik qyzmetshilerdi turǵylyqty jerinde bolýyn jáne óz qalalary men eldi mekenderinen ketpeýlerin suraımyz.
Jaýapkershilik tanyta otyryp, qyzmettik mindetterdi oryndaýǵa da, rejımniń saqtalýyna da barynsha qatań qaraý kerek.
Ekinshiden. Memlekettik organdarda aǵymdaǵy keńester men otyrystardy ótkizýdi shekteý.
Aqparattyq tehnologııalar ǵasyry bizge skaıp-qosylystar, vıdeokonferensbaılanys jáne messendjerler arqyly jedel kelissózder men keńester júrgizýge múmkindik beredi. Memlekettik organdardyń basshylaryn osy múmkindikterdi keńinen qoldanýǵa shaqyramyn.
Úshinshiden. Aǵymdaǵy tapsyrmalardy oryndaý merzimin qaıta qaraý.
Qaýipsizdikti qamtamasyz etý, halyqty qorǵaý, áleýmettik jáne ózge de halyqty qamtamasyz etý máselelerine qatysty emes tapsyrmalardyń baqylaý merzimderin tótenshe jaǵdaı ýaqytynda uzartýdy nemese toqtatýdy usynamyz.
Ýaqytyly aldyn alý sharalaryn qabyldaı otyryp, biz, memlekettik qyzmetshiler, osy kezeńde bizdiń otandastarymyzdyń qaýipsizdigi men jaılylyǵyn qamtamasyz ete alamyz.
Birlesip, biz azamattarymyzdyń densaýlyǵyn jáne memlekettik apparattyń tolyqqandy jumys isteýin qamtamasyz etetinimizge senimdimin!