19 naýyz kúni túngi saǵat 00.00-den bastap, elimizdiń eki úlken shahary – Nursultan men Almaty karantınge jabylady. Búkil bir qalany jabý táýelsiz memlekettiń tarıhynda bolmapty. Sondyqtan bolar, mundaı tótenshe jaǵdaıdy túsinbeı, dal bolyp júrgender kóp.
Karantın degenimiz – shekteý, ıaǵnı qalaǵa syrttan kirip-shyǵýǵa tyıym salynady. Tarata aıtsaq, elordaǵa ózge óńirlerden qatynaıtyn avtobýstar júrmeıdi. Qalaǵa kirip-shyǵý beketterine shekteý qoıylyp, syrttyń kólikterin kirgizbeıdi. Al siz karantın ýaqytyna deıin shahardan shyǵyp ketken bolsańyz jáne osy qala turǵyny bolsańyz, turǵylyqty jerińizge qaıtadan kire alasyz.Bul karantınniń basty maqsaty – koronavırýs indetin el arasynda órshitpeý, sol arqyly turǵyndardyń densaýlyǵyn qorǵap, qaýipsizdigin saqtaý. Sondyqtan Nursultan men Almaty aınalasyndaǵy barlyq beketke azamattardyń qyzýyn ólsheıtin qurylǵysy bar qosymsha pýnktter ornatylady.
Budan bólek, iri oıyn-saýyq ortalyqtary ýaqytsha jumysyn toqtatady, halyqqa qyzmet ortalyqtary qysqarǵan rejımmen jumys isteıdi. Biraq azyq-túlik dúkenderi, dárihanalar, kólik jýatyn oryndar jumysyn jalǵastyra beredi. Demek, turǵyndar da kerek kezde úıinen shyǵyp, qajetti azyǵyn, dári-dármegin satyp ala alady. Halyqtyń júris-turysyna shekteý joq. Alaıda shekteý joq eken dep kózge kóringen oryndy jappaı aralap ketýge bolmaıdy, árkim óziniń jáne jaqyndarynyń densaýlyǵy úshin úıde otyrǵany abzal. Sanaly adam el bıliginiń jasap otyrǵan saqtyq sharasyna jaýapkershilikpen qaraıdy dep oılaımyz.
Kópshilik karantındi barlyq qozǵalysqa tyıym salý dep te túsinip júr. Olaı emes. Mundaı tyıym salýdy komendanttyq ýaqyt deıdi. Jurtshylyqqa málim, elimizde komendanttyq ýaqyt burynnan bar. Atap aıtqanda, elimizdiń zańy boıynsha, kámelettik jasqa tolmaǵan jetkinshekter oıyn-saýyq mekemelerinde túngi saǵat 22.00-den tańǵy 6.00-ge deıin júrýge bolmaıdy, bul – tyıym salynǵan komendanttyq saǵat. Al karantın – komendanttyq ýaqyt emes, tek shekteý, el arasyndakúrdeli epıdemıologııalyq jaǵdaıdy týǵyzbaý úshin memlekettiń jasap otyrǵan aldyn alý sharasy.
О́zge elder karantındi vırýstyq ınfeksııa ábden tarap, aýyzdyqtaý múmkin bolmaı bara jatqanda jarııalaıdy. Al Qazaqstan indettiń aldyn alý úshin engizdi. Bul eń aldymen halyqtyń qamy úshin jasalyp otyr. Sondyqtan eldiń tutastyǵy synalar osyndaı mańyzdy sátte bárimiz aýyzbirshilik tanytyp, aýrýdy birge jeńýge atsalysqanymyz jón.
Qymbat TOQTAMURAT