«Egemen Qazaqstan» gazetiniń 24 aqpan kúngi sanynda «Jylý qýatynyń tapshylyǵy óńir damýyna kedergi» degen maqala jarııalanǵan edi. Kóterilgen másele nazarǵa alyndy ma, joq pa, biraq dál osy jylý tapshylyǵy máselesi oblys ákimi Ábilqaıyr Sqaqovtyń tóraǵalyǵymen ótken jıynda talqylandy.
Oblys ákiminiń birinshi orynbasary Suńǵat Esimhanovtyń málimdeýinshe, bıylǵy jylytý maýsymynda turǵyndardan jylýdyń jetkiliksizdigine baılanysty 814 shaǵym túsken. Jylytý maýsymynda jylýmen qamtıtyn kásiporyndarda kómir qorynyń naqty mólsheri belgilenbeýine baılanysty jylý tapshylyǵy oryn alǵan. Ekinshiden, oblys ortalyǵyna jylý beretin kásiporyndarda qazandyqtardaǵy jóndeý jumystarynyń sapasyz júrgizilýine oraı, tehnologııalyq shaǵyn apattar jıilep ketken.
Jıynda aldaǵy ýaqytta tehnologııalyq shaǵyn apattarǵa taldaý jasalatyny aıtyldy. Infraqurylymnyń tehnıkalyq jaǵdaıyna aýdıt júrgizilmek. О́ńirde «Nurly jer» baǵdarlamasy boıynsha jylý jelileri jóndeledi. Shyǵynnyń 70 paıyzy respýblıkalyq, 15 paıyzy jergilikti bıýdjetterden, qalǵan 15 paıyzy kásiporynnyń ınvestısııalyq baǵdarlamasy esebinen ótelmek.
Mysaly, ekibastuzdyq MAES-2 stansasynda kúrdeli jóndeýden ótken energııa blogy toqtatylǵan. О́ıtkeni qatty jel turyp, boran soqsa, elektr jelileri úziledi. Stansadaǵy jylý jelilerinde de aqaýlar az emes.
Jıynda oblys ákimi Á.Sqaqov jelilerdiń zaqymdalý kórsetkishiniń kóbeıip ketý sebebin surady. «Pavlodar jylý jelileri» JShS basshysy Marat Imanaevtyń aıtýynsha, jylý qubyrlary ábden eskirip, paıdalaný ýaqyty ótken. Iаǵnı kásiporyn jyl saıyn 18 shaqyrym qubyr aýystyrýy tıis.
Sondaı-aq oblys ortalyǵyndaǵy ekinshi Pavlodar aýmaǵynda jerasty qubyrlarynyń jaǵdaıy oılantýda. Endi bul qubyrlardy jerdiń betine shyǵarý josparlanýda. О́ıtkeni bul aýmaqta jerasty sýlarynyń mólsheri kóp. Jeke úıler sý astynda qalýy múmkin.
– Kásiporyndardyń ınvestısııalyq jobalary jergilikti ákimdiktermen úılestirilmegeni baıqaldy. Jylý tapshylyǵyn boldyrmaý úshin osy salaǵa jaýapty basqarmanyń ózindik mindetteri bar, – dedi oblys ákimi.
Jıynda oblys ortalyǵynda, óńirde jylý máselesi tapshylyǵyn saralaýda naqty aqparattyń bolmaǵany úshin turǵyn úı-kommýnaldyq nysandar men jergilikti ákimdiktiń arasynda úılesimdi jumys pen basqarýshylyq sheshim shyǵara almaǵan oblystyq energetıka jáne turǵyn úı-kommýnaldyq sharýashylyq basqarmasynyń basshysy Murat Ábilqalyqovqa sógis jarııalandy.
Pavlodar oblysy