19 naýryz saǵat 00.00-den bastap Nur-Sultan qalasy boıynsha karantın engizilýine baılanysty elordalyq Qurylys basqarmasy barlyq qurylys-montaj jumystarynyń jalǵasatyndyǵyn málimdedi. Bul týraly qala ákimdiginiń baspasóz qyzmeti habarlady.
- Qaladaǵy barlyq qurylys-montaj jumystarynyń jalǵasatyndyǵyn habarlaımyz. Sondyqtan barlyqtaryńyzdy sanıtarlyq-gıgıenalyq saqtyq sharalaryn saqtap, sabyr tanytýǵa shaqyramyz, - dedi qalalyq Qurylys basqarmasy basshysynyń orynbasary Núrken Tólendıev.
Habarlamaǵa sáıkes qurylys nysandarynda kelesideı qaýipsizdik sharalaryn saqtaǵan jón:
Árbir qyzmetkerge karantın jóninde aqparat berý. Qurylys nysandaryndaǵy jeke quramdy gıgıenalyq quraldarmen, atap aıtqanda medısınalyq betperde, antıseptıkalyq quraldarmen jáne basqa dezınfeksııalyq jabdyqtarmen qamtamasyz etý. Qyzmetkerlerdiń densaýlyǵyn únemi tekseristen ótkizip, COVID -19 vırýstaryna tán sımptomdar anyqtalǵan jaǵdaıda, tıisti organdarǵa (103, 1406 nómirleri arqyly) habarlaý. Bir bólmede adamdardyń shoǵyrlanýyna shekteý qoıý. Qurylys aýmaǵyn derbes aımaqtarǵa bólý. Qurylysshylardy turaqty meken jaıynan qurylys nysanyna jáne keri qaıtý baǵyttaryn bekitip, turaqty tasymaldaý júıesin uıymdastyrý. Basqa óńirlerden kelgen jáne karantınge alynǵan aımaqtan tys jerde turatyn qyzmetkerlerdi barlyq sanıtarlyq-epıdemıologııalyq normalarǵa sáıkes turǵylyqty jermen qamtamasyz etý. Qurylys nysandaryna bógde adamdardyń kirýine tıym salyp, qaýipsizdik sharalaryn kúsheıtý.Qurylys basqarmasy karantındik is-sharalarǵa baılanysty talaptar ózgertilgen jaǵdaıda qosymsha habarlaıdy.