2.
Karantındegi on altynshy kún. Redaksııa terezesinen kókmunarlanyp kórkem qala kórinip tur. Saǵat 15:25. Seısenbi.
Eki qolymda medısınalyq qolǵap, betperde, qaltamda – antıseptık. Áriptestermen alystan amandasamyz. «Amansyz ba?», «Esensiz be?»... Aman-esen. Jalpy, sózderde, uǵymdarda ulttyń myń jyldar boıy keshken tarıhy turady. Sóz – halyqtyń jady, tarıhı jady. Arhetıptik sana sózde tur. Sóz ólse, arhaızmge aınalsa, sol dáýirdiń de ólgeni. Bir sózben birge tutas bir kezeń joǵalady. Islammen birge «aman» sózi keldi, oǵan deıingi dáýirden jetken túrkiniń óz «esen» sózi bar. Ekeýi qosylyp, «aman-esen» boldy. Eki dáýir, eki bólek jad, eki bólek álem birtutas sózge, qos sózge aınaldy. Aman sózi amanattan shyǵady. Amanatyńyz – arabtyń saqtaý, saqtalýy. «Amanbysyń?» - «saqtalyp turmysyń?» degeni.
Adamdardyń bir-birinen saqtanýy – birin biri saqtaýy. Vırýstan qorǵanamyz, qorǵaımyz. Aýyz-muryndy tumshalap, qoldy qaptap, qaıta-qaıta jýǵanda, bizdiń árbirimizde basqa da «vırýstar» bar ekenin eriksiz oılaısyń. Minezdegi, sezimdegi, oıdaǵy, is-árekettegi vırýstar. Olar da juqpaly. Ortańnan juǵady, ortańa juqtyrasyń, balańa juqtyrasyń. Tutas býynǵa juqtyrasyń. Qoǵamǵa, adamzatqa taratasyń. Osy vırýstardan biz qorǵanamyz ba? О́zgeni qorǵaýǵa tyrysamyz ba? Keri, teris minezder, kerenaý sózder, tipti ádetter – osynyń bári bizdiń vırýstarymyz. Mıdaǵy, júrektegi vırýstar. Olar da adamdy óltiredi. Kembaǵal qylady. Rýhanı múgedekke aınaldyrady. Biz rýhanı vırýs juqqan adamdardan da aınala qashamyz. «bálesi juǵady» deımiz, «báleńiz» – sol vırýs.
Betperde kıgen kóktem. Kún jarqyrap tur. Biraq, bir kóńilsizdik bar. Eýropany kezgen kommýnızm elesindeı. Ol da vırýs bolatyn.