Jýyrda Maı aýdandyq «Shamshyraq» gazetiniń 80 jyldyǵy atalyp ótti. Mereıtoıǵa oraı ótken jıynǵa gazet ardagerleri, zııaly qaýym ókilderi, aýdan turǵyndary-oqyrmandar qatysty. Jınalǵan qaýymdy aýdan ákimi Marat Aqtaev quttyqtap, basylym ujymyna shyǵarmashylyq tabys tiledi.
– Gazetimizdiń 2015 jylǵy 27 maýsym kúngi sanynda shyqqan Ilál Ahmedıdiń «Aýdan baspasóz qyzmetiniń tarıhynan» atty maqalasynda – «Bizdiń Maı aýdandyq gazetimizdiń alǵashqy ataýy «Stalın týy» bolypty. Tuńǵysh redaktor B. Altybasarov degen azamat edi. Shaǵyn ǵana gazet. Jurt ony Altybasarovtyń áljýaz shaǵyn dene bitimine qaraı «Altybasarovtyń gazeti» atap ketken-di» dep jazady, – deıdi aýdandyq gazettiń qazirgi redaktory Altynbek Baıǵalıev.
1965 jyldyń 1 mamyry kúni «Maıak» atalǵan aýdandyq gazettiń alǵashqy sany Ilál Ahmadıdiń basshylyǵymen jaryq kóredi.
– Osy jyldary 19 jasymda gazetke orys tilindegi aqparattardy qazaqshalaıtyn, aýdarmashy ári tilshi bolyp qyzmetke keldim. Osy gazettegi alǵashqy eńbek jolym arqyly úlken jolǵa túsip, qoǵamdyq ómirge aralastym, – deıdi jýrnalıst Sosıal Áıtenuly.
Keıingi jyldary gazet redaktorlary bolyp Á.Ahmetov, V.Shvaıko, G.Nurmaǵanbetova, Q.Temirǵalınov, G.Dúrmanova, J.Tóleýbaev, S.Jaqypov, E.Jumadilov, S.Muhtarovtar qyzmet atqardy. Marqum Baqyt Ábilqasova, Nurbıbi Janaqova, Sulýbıke Omysheva, Orman Hamıtuly, Aıman Aqtandar tilshiler legin jalǵastyrdy.
Egemendik alǵan soń «Stalın», «Maıak» degen ataýlarmen qoshtasyp, «Shamshyraq» keldi jarqyrap. Qazaq redaksııasynyń negizin qalaǵan jýrnalıster Qaıyr Júnisqalıev, Sovet Jaqypov, Serik Muhtarov «Shamshyraqtyń» jaryǵy shalqýyna úles qosty.
Jıyn barysynda ótken jyldardyń sýretteri, sarǵaıǵan gazetter qoıylǵan kórme uıymdastyrylyp jáne gazettiń belsendi avtorlary Qaıyr Jumajanov, Ǵabıt Saparov, Jańbyrbaı Adamjanov, Ertisbaı Jumabekov, Berik Eskendirovter aýdandyq máslıhattyń Alǵys hattarymen marapattaldy.
Aýdandyq «Shamshyraq» gazeti de aqparat aǵyny tasqyndaǵan ýaqytqa saı ınternetpen jarysa aýyldaǵy oqyrmanyna asyǵady.
Pavlodar oblysy,
Maı aýdany