Qorǵanys mınıstri Nurlan Ermekbaev keıbir oblystarda áskerı mindetke shaqyryp, jıyn jasaqtaý múldem qajet bolmaýy da múmkin ekenin aıtty.
«Mysaly, áskerı bólimsheleri bar oblystarda áskerılerdiń basym bóligi mindetterdi tolyq atqaryp jatyr. Keıbir mindetter ózge oblystarǵa bólindi. Búginde áskerılerdiń aıtarlyqtaı bóligi strategııalyq mańyzdy nysandardy, qarýly qoımalardy kúzetýde. Desek te, qorǵanys kúshteriniń rezervi qajet. Sondyqtan da, ákimder óńirlerde áskerı mindettilerdi shekteýli kólemde shekteýli ýaqytqa jınap, qoldaý kórsetkenderi abzal. Áskerı mindettiler jıyn kezinde áskerı qyzmetker laýazymyna ıe bolady. Olar barlyq áleýmettik jeńildiktermen qamtylady. Ol azyq-túlik, kıim-keshek jáne medısınalyq qyzmettermen qamtamasyz etiledi» dedi N.Ermekbaev.
Aıta keteıik, Ákimder áskerı mindettilerdi arnaıy jıyndarǵa shaqyra alatynyn habarlaǵan bolatynbyz.