28 medısınalyq qyzmetker koronavırýs juqtyryp aldy

О́tken jumadaǵy jaǵdaıǵa toqtalǵan elimizdiń bas dárigeri karantın sharalary kúsheıtilgen soń respýblıka bo­ıynsha aýrýdyń taralý deńgeıi birshama tómendegenin atap ótti. «Dúnıe júzinde koronavırýs jaǵdaıy nasharlap kele jatyr. О́tken táýlikte naýqastardyń sany 8,4 paıyzǵa ósti, álem boıynsha bul indetten 53 myńǵa jýyq adam kóz jumǵan. Elimizde koronavırýs juqtyrý boıynsha barlyǵy 453 jaǵdaı tirkeldi. Onyń eń kóbi Nur-Sultan (199) jáne Almaty (93) qalalarynda. 29 adam emdelip, aýrýhanadan shyǵaryldy. Qazir 11 naýqastyń jaǵdaıy qıyn. Olar ıntensıvti rea­nımasııa bólimderinde em qabyldap jatyr. 68 pasıenttiń jaǵdaıy ortasha deńgeıde, 341 pasıenttiń jaǵdaıy jeńil nemese sımptomsyz naýqastar. Osy naýqastarmen baılanysta bolǵan 13 467 adam anyqtalǵan. Olardyń arasynda 442 azamat shetelge shyǵyp ketti. Qalǵan 13 025 azamattyń 96,7 paıyzy tabylyp, stasıonarǵa jáne úıge oqshaýlandy. Bul jumystar jalǵasyp jatyr. О́tken aptada naýqastar sanynyń kóbeıýi kún saıyn 30-50 paıyz aralyǵynda qubylyp turatyn. El boıynsha karantın sharalary kúsheıtilgen soń, ınfeksııanyń taraýy 9-12 paıyzǵa deıin tómendedi. Bul Úkimet pen óńir ákimderi júrgizgen karantın sharalarynyń tıimdiligin kórsetedi», dedi mınıstr.

Tótenshe jaǵdaıǵa baılanysty Mem­­lekettik komıssııa sheshimimen Nur-­Sultan men Almatydaǵy ju­mys­ty toq­tatý taǵy bir aptaǵa sozyldy. Mınıs­tr­­diń aıtýynsha, bul ekin­shi apta eń­bek ujym­daryndaǵy, qoǵam­dyq oryn­dar­daǵy baılanysty azaıtyp, ınkýba­sııa­lyq kezeńde júrgen naýqas­tardy anyq­taýǵa múmkindik beredi. «Aýrý juq­tyrý jaǵdaılarynyń 30 paıyzy eńbek ujym­darynda tirkelgenin aıtqan edik. Jumys oryndary ınfeksııanyń taralýyna aıtarlyqtaı yqpal etti. 28 naýryzdan bas­tap Nur-Sultanda naýqastar ósimi kú­ni­ne 60 jaǵdaıdan 15 jaǵdaıǵa deıin tó­men­dedi. Almatyda 8-den 2 jaǵdaıǵa deıin azaıdy. Munyń barlyǵy karantın men oq­shaýlanýdyń tıimdi bolýynan», dedi ol.

Memlekettik komıssııa epıdemııaǵa qarsy jáne sanıtarlyq standarttardy múltiksiz oryndaý, medısınalyq uıymdardy maqsatty qoldaný jáne karan­tındik jáne provızorlyq sta­sıo­narlardaǵy medısınalyq qyzmet­ker­lerdi karantındik jaǵdaıǵa aýystyrý týraly sheshim qabyldady. Mınıstrdiń aıtýynsha, naýqastarmen baılanysta bolǵan medısınalyq mamandar bul nysandarǵa kelmeýi tıis. «Dárigerlerge tıisti turmystyq jaǵdaı jasalýy kerek. Birqatar óńir bul jumysty belsendi túrde bastap ketti. Meniń oıymsha, me­dı­sınalyq mamandardyń máseleleri she­shilip, kúdigi seıiledi. Túsinemiz, kóptegen maman aýrýdan qaýiptenip, úılerine barǵysy kelmeıdi. Sondyqtan bul sheshimge tolyq negiz bar», degen mınıstr oblys ákimderi epıdemııa ke­zindegi jumysta dárigerlerge qonaqúı men jataqhana taýyp, kólikpen jáne ta­maq­pen qamtamasyz etip jatqanyn jetkizdi.

Biraq soǵan qaramastan 28 medı­sı­nal­yq qyzmetkerdiń aýrý juqtyrǵanyn aıtqan Eljan Birtanov vırýs juqtyrý qaýpi joǵary oryndarda jumys istep júrgen mamandardyń statıstıkasy júr­giziletinin jetkizdi. Sondaı-aq óz týystarynan da aýrý juqtyrǵan medısınalyq mamandardyń bar ekenin aıtqan mınıstr: «Barlyq jaǵdaıda da vırýs tabylǵan jumys oryndarynda sanıtarlyq-epıdemııalyq tekserý júrgiziledi. Medısınalyq nemese basqa da eńbek ujymdary karantınge jiberiledi. Árıne naýqastar emdelip jatqan ǵımarattarda qaýip basym. Sondyqtan ondaǵy medı­s­ınalyq qyzmetkerlerge erekshe kóńil bólemiz. Olar da ózge naýqastar sekildi ınfeksııalyq aýrýhanaǵa jatqyzylyp, em alady», dedi.

Qazaqstan Dúnıejúzilik densaýlyq saqtaý uıymymen birlesip, aýrýdyń tıimdi terapııasyn irikteý boıynsha jahandyq medısınalyq zertteýge qatysa bastaǵanyn jetkizgen Densaýlyq saqtaý mınıstri elordada respýblıkalyq ıntensıvti terapııa ortalyǵynyń ashyl­ǵanyn habarlady. «Naýqastardyń kóbi – 50-den asqan kisiler. Olarǵa durys em uıymdastyrý úshin osy aptada Nur-Sultan qalasynda ınfeksııalyq stasıonarda respýblıkalyq ıntensıvti terapııa ortalyǵyn ashtyq. Bul Ulttyq kardıohırýrgııa ortalyǵynyń basshysy Iýrıı Pıanyń jáne onyń áriptesteriniń qoldaýymen jáne qatysýymen ashyldy. Onda osy ortalyqtyń dárigerleri, reanımatologtar, perfýzıolog jáne basqa da mamandar osy ortalyqta jumys isteýdi bastady. Jaǵdaıy óte aýyr naýqastar bas qalaǵa jetkizilip, emdeletin bolady. Biraq Almatydaǵy Infeksııalyq aýrýhanada medısınalyq kómek óte joǵary deńgeıde uıymdastyrylǵan. Keıbir naýqastar qıyn jaǵdaıdan ótip, beti beri qarady. Ár naýqas boıynsha vıdeo konferensııa arqyly respýblıkalyq konsılıým ótedi. Onda bizdiń eń bilikti mamandar tikeleı qatysyp, qajetti sharalar engizedi. Onyń barlyǵy meniń baqylaýymda», dedi E.Birtanov.

Sondaı-aq mınıstr Memlekettik komıssııanyń sheshimimen Nur-Sultan, Almaty jáne Shymkent syndy úsh qalada mobıldik tez qurylatyn aýrýhanalardyń qurylysy bastalǵanyn atap ótti. «Nur-Sultan qalasynda birinshi deńgeıde 200-250 tósek oryndyq aýrýhananyń qurylysy bastaldy. Sebebi qazirgi bizdiń jospar boıynsha 2 myńǵa jýyq naýqasqa arnalǵan ınfeksııalyq tósek oryn qajet. Al qazir elorda aýrýhanalarynda 800 ınfeksııalyq tósek oryn bar, bos oryndar jetkilikti. Biraq biz bo­lashaqty da boljaýymyz kerek. Soń­ǵy aptalarda jergilikti deńgeıde bos basqa medısınalyq uıymdardy paı­da­lanyp júrmiz. Biraq joǵary deńgeı­degi halyqaralyq standartqa saı em kór­setý úshin arnaıy medısınalyq uıym qajet. Sondyqtan osy sheshimge kel­dik. Al bul aýrýhanalardyń ishinde qajet­ti sa­nıtarlyq dezınfeksııalyq rejim bo­la­tyndyqtan onyń mańyndaǵy turǵyn­darǵa qaýip joq», degen mınıstr shıkizat she­telden keletindikten qu­ry­lys­tyń ońaıǵa soqpaıtynyn da atap ótti.