Oblys ákimdiginde ótken jıynda aımaq basshysy Arhımed Muhambetov tótenshe jaǵdaı rejimine nemquraıly qaraıtyndarǵa endi qatań shara qoldanylýy múmkin ekenin aıtty. О́ıtkeni talap kúsheıgenimen, tártip buzýshylardyń azaıatyn túri joq.
- Polısııa qyzmetkerleri 250 ákimshilik quqyq buzýshylyqty anyqtady. Sot 91 materıal boıynsha sheshim shyǵardy. Sottyń qaraýynda áli 159 materıal jatyr, -dedi Arhımed Muhambetov.
Rejim tártibin saqtamaǵandardyń 18-i eskertý alsa, 63 adamǵa ákimshilik aıyppul salynǵan, al 7 azamat qamaýǵa alynypty. 154 tártip buzýshyǵa qandaı shara qoldanylatynyn sot qarap jatyr. Olardyń ishinde 22.00-den keıin jumysyn toqtatpaǵan 46 kásipker, betperde, qolǵap paıdalanbaǵan 125 dúkenshi, sanıtaızersiz jumys istegen 53, azyq-túlikti beti ashyq kúıinde satqan 7 dúken qojaıyny bar. Bulardyń qatarynda úı karantıni talabyn buzǵan taǵy 8 adam bar.
Oblys turǵyndary men kásipkerlerdi jalpyǵa birdeı mindet etilgen tártip talaptaryn saqtaýǵa shaqyrǵan aımaq basshysy: - Men kásipkerlerge, onyń ishinde birinshi kezekte kafe, meıramhana jáne adamdar kóp shoǵyrlanatyn nysandardyń qojaıyndaryna eskertý jasaımyn. Budan bylaı anaǵurlym qatań sharalar qoldanylady, 15 kúnge deıin qamaýǵa alynýlaryńyz múmkin, - dedi.
Qostanaı oblysy