Atyraýlyq 11-synyp oqýshysy Eldar Qurmashev KazMessage mobıldi qosymshasyn jasap shyǵardy. WhatsApp messendjeriniń balamasy sanalatyn bul baǵdarlama smartfondarǵa arnalǵan Android operasııalyq júıesinde qoldanylady.
Ol bıyl Atyraý qalasyndaǵy Á.Jangeldın atyndaǵy orta mektepti bitirgeli otyr. Jaqynda ózi oılap tapqan KazMessage qosymshasyn Playmarket-ke ornalastyrdy. Qosymshany on kúnniń ishinde 120 adam uıaly telefonyna júktep alǵan.
– KazMessage qosymshasyn 55 tilde qoldanýǵa bolady. Túngi rejimi de bar. Basqa baǵdarlamalardan bir ereksheligi, telefonyńyzdy joǵaltsańyz, arnaıy belgilengen 30 san arqyly qosymshany basqa qurylǵyǵa júktep, kontaktilerdiń sms-hattary men sýret, vıdeolaryn júktep alýǵa bolady. Ár adammen baılanysýǵa bólek áýen qoıýǵa bolady. Bir topqa 250 adamdy tirkeı alasyz. Ony barlyq qazaqstandyq paıdalanǵanyn qalaımyn. Bilikti IT mamandary kómektesse, qosymshany jetildirip, qoldanys aıasyn keńeıter edim. Bul qosymshany ınformatıka páninen ǵylymı jobamda tereńirek zerttep júrmin, – deıdi Eldar Qurmashev.
Jańalyqqa qumar oqýshy jańa qosymshany App Store, Windows baǵdarlamalaryna qoldaný nusqasyn izdestirýde. Biraq, osy joba arqyly paıda tabýdy kózdemepti. Besinshi synyptan beri IT salasyna qyzyǵyp, bastapqyda buzylǵan kompıýter qurylǵylaryn jóndepti. Keıin ınternet-dúkender ashqan.
– Meniń maqsatym – qazaqstandyq brend qalyptastyrý. Qazaq jastarynyń osyndaı jańashyl baǵdarlamalardy oılap taba alatynyn dáleldegim keldi. Bolashaqta qosymshanyń arnaıy saıtyn ashyp, avtorlyq quqyq alýdy oılastyryp júrmin, – deıdi ol.
Joldasbek KО́ShERBAIULY
Atyraý oblysy