Aýyldastyń nemese týysqannyń jaǵdaıyn telefon arqyly bilgenniń ózine táýba derlik búgingi jaǵdaı, ásirese, qarııalar men múmkindigi shekteýli jandarǵa qıynyraq tıip tur. Osy oraıda «Biz birgemiz!» aksııasynyń da, onyń sheńberindegi «Meıirimdi aýyldastar» syndy chellendjdiń de mańyzy zor.
Osy úlgili is, búginginiń tilimen aıtqanda chellendj aıasynda túrkistandyqtar oblys aýmaǵynda turatyn qart kisiler men turmysy tómen kóp balaly otbasylarǵa azyq-túlik, kerek-jaraqtaryn alyp berip, kómek qoldaryn sozýda. «Meıirimdi aýyldastar» aıasynda atqarylyp jatqan qaıyrymdylyq sharalaryna kásipkerler, eriktilermen qatar aýdan, qalalardyń belsendi jastary atsalysýda.
Mysaly, Otyrar aýdanynyń erikti jastary jergilikti kásipkerlermen birlese 5 otbasyn azyq-túlikpen qamtamasyz etip, úı sharýalaryna kómektesti. Shardara aýdandyq «Jastar resýrstyq ortalyǵy» qyzmetkerleriniń uıymdastyrýymen aýdan aýmaǵyndaǵy qarııalarǵa medısınalyq qural-jabdyqtar men bir rettik azyq-túlikter jetkizildi. Báıdibek aýdanynyń kásipkerleri eldi mekenderdegi áleýmettik az qamtylǵan 300 otbasyǵa 17,5 tonna un men 1,75 tonna kúrish, 1,75 tonna ósimdik maıyn taratýda.
Atalmysh chellendj oblystyń barlyq aýdan, qalalarynda jalǵasyn taýyp, qaıyrymdy azamattar, erikti jastar qarııalar men kómekke muqtaj jandardyń alǵysyn alýda.
Túrkistan oblysy