Ispanııanyń bas shahary – Madrıd qalasyndaǵy áıgili «Santıago Bernabeý» stadıonynda koronavırýsqa qaramastan jóndeý jumystary jalǵasýda.
Dańqty «Real» klýby men Ispanııanyń ulttyq quramasy óner kórsetetin atalǵan sporttyq nysan 1947 jyly salyndy. Sol kezderi qurylys jáne jóndeý-jabdyqtaý jumystaryna shamamen 1,7 mıllıon evro kóleminde qarajat jumsaldy. Buǵan deıin de 81 044 kórermenge eseptelgen stadıonda birneshe ret rekonstrýksııa júrgizildi.
Bul jerde san márte Eýropa chempıondarynyń kýbogy, ÝEFA kýbogy, Chempıondar lıgasy jáne 1964 jylǵy Eýropa birinshiligi men 1982 jylǵy álem chempıonatynyń fınaldyq saıystary ótti. «Santıago Bernabeý» basqa da talaı tarıhı oqıǵalardyń kýási bolǵany barshaǵa málim.
Sarapshylardyń esepteýinshe, bul joly jóndeý-jabdyqtaý jumystaryna 570 mıllıon evro jumsalyp, ol 2022 jyldyń qazan aıynda aıaqtalady dep josparlanýda.