Aqtóbe qalasy karantınge jabylsa da, halyqqa qyzmet kórsetýdi toqtatpaǵan qurylymdar men mekemeler de bar. «BankSentrKredıt» pen «Kazpochta» AQ-nyń Aqtóbe oblysy boıynsha fılıaldary solardyń qatarynda tur.
Atalǵan qos mekeme mamandarynyń karantın jaǵdaıynda jumys isteýge birshama tóselip qalǵandary baıqalady. Kózimiz kórgen kórinis: munda birinshi kezekte tutynýshylar men qyzmetkerler arasynda belgili bir alshaqtyq saqtalýyna mán berilgen eken. Zalalsyzdandyrý qurylǵylary men qondyrǵylary da tótenshe jaǵdaı talaptaryna sáıkes paıdalanylyp júrgenin ańǵardyq. Joǵary quzyrly organdardan berilgen tapsyrmalarǵa sáıkes atalǵan mekemelerde qyzmet túrleriniń 90 paıyzyn onlaın rejımi boıynsha kórsetý tártipteri qolǵa alynǵan. Olardyń qyzmetine júginetin turǵyndaryń belgili bir bóligin zeınet jasyndaǵy adamdar quraıdy. Olardyń bári birdeı saıtpen jumys isteýdi nemese mobıldik qosymshalardy paıdalaný daǵdylaryn bilmeýi nemese ıgermeýi ábden múmkin. Bul rette atalǵan fılıal mamandarynyń ony jasy ulǵaıǵan adamdarǵa túsindirýge jáne úıretýge den qoıýlary da quptarlyq másele.
Munan keıingi kezekte egemen.kz tilshisiniń baǵyt-baǵdary oblys ortalyǵyndaǵy «Almaty» kóterme saýda bazaryna qaraı oıysty. Áýelgide atalǵan saýda orny karantın kezinde nege ashyq tur degen oıda qalǵan edik. Joq, kerisinshe bazar buǵan deıin jabylyp, óńir basshysynyń kelisimine sáıkes kúni keshe qaıtadan ashylyp, jumys isteýine ruqsat berilipti. О́ıtkeni bazar qojaıyndary men qyzmetshileri karantın kezinde qoıylatyn qaýipsizdik pen saqtandyrý sharalaryn jáne sanıtarlyq-epıdemıologııalyq talaptardy muqııat saqtaý jóninde ózderine jaýapty mindet alǵan kórinedi. Búgingi kúni onyń oryndalýy jónindegi máselege syn taǵa almaǵan jaıymyz bar. Bulaı deýimizdiń basty sebebi – tıisti tekserýler júrgizilgen kezde budan shıkilikter shyqpaǵan. «Almaty» kóterme saýda bazaryna birinshi kezekte paıdalanatyn azyq-túlik taýarlaryn satýǵa ruqsat berilip, olar osy tapsyrma údesinen shyǵa bilýge umtylys jasap júgenderi aıqyn kórindi.
Osyndaı oń pikirdi «Álııa-centr» bazary ıelerine qatysty da aıtýǵa bolatyn sekildi. Atap aıtqanda, saýda orny qajetti antıseptıkalyq zalasyzdandyrý quraldarymen qamtylǵan. Satýshylar óz qyzmetterin medısınalyq betperdeler men qolǵap kıgen jaǵdaıda júrgizýi jolǵa qoıylǵan.
Árıne, bul aıtylǵandarǵa qarap Aqtóbe qalasynda karantın kezinde qyzmet kórsetip júrgen mekeme uıymdarynyń bári birdeı belgilengen erejeler men qoıylǵan talaptardy oryndap júr eken desek ushqarylyqqa urynar edik. Ashyǵyn aıtqanda, ony belden basyp júrgen mekemeler de bar bolyp shyqty. Aıtalyq, «Avtotehsentr» JShS kólik jóndeý ortalyǵy men «Dciti» kólik jýý oryndarynda jumys alýshylardyń medısınalyq perdesiz júrý kórinisteri kezdesip otyr. Sondaı-aq atalǵan ortalyq ıeleri tıisti zalasyzdandyrý qurylǵylaryn alýǵa da mán bere qoımapty. Endeshe Aqtóbe oblysynyń bas sanıtarlyq dárigeri Nursulý Berkimbaeva aldaǵy ýaqytta mundaı olqylyqtardyń oryn almaýyn nazarda ustaı bilse ıgi.