Jambyl oblysynyń ákimi Berdibek Saparbaevtyń tóraǵalyǵymen ótken apparattyq keńeste aımaqtyń aǵymdaǵy jyldyń birinshi toqsanyndaǵy áleýmettik-ekonomıkalyq damý qorytyndylary saralandy. Sondaı-aq, jergilikti atqarýshy organdardyń karantın jaǵdaıyndaǵy is-áreketteri jáne halyqpen keri baılanys ornatýǵa qatysty máseleleri talqylandy.
Oblystyq ekonomıka jáne bıýdjettik josparlaý basqarmasynyń basshysy Gúldana Jaýynbekovanyń aıtýynsha, aǵymdaǵy jyldyń úsh aıynda oblys boıynsha 114,7 mıllıard teńgeniń ónimi óndirilip, ónerkásiptegi ónim kóleminiń ındeksi 97,9 paıyzdy quraǵan. Alaıda, ekonomıkalyq kórsetkishterdiń tómendeýine «Qazfosfat» JShS zaýytyndaǵy peshtiń jáne Taraz ben Merki qant zaýyttary jumystarynyń toqtaýy áser etken.
Bıýdjet kirisindegi kórsetkishter de oıdaǵydaı emes. Memlekettik kirister departamenti basshysynyń habarlamasynda kórsetilgendeı, jergilikti bıýdjettiń shyǵyndary 3,195 mıllıard teńgeni quraıdy.
Biraq, Berdibek Saparbaev karantınniń erte me, kesh pe aıaqtalatynyn, ómir aǵymy óz arnasyna túsetinin, sondyqtan da búgingi jaǵdaıdy tıimdi paıdalanyp, kórsetkishterdi qalpyna keltirýge tyrysý kerektigin aıtty.
«Eń aldymen, jergilikti jerlerdegi ahýaldyń naqty kórinisine muqııat taldaý jasap alý mańyzdy. Búgin ne isteý kerekpiz, erteń ne isteı alamyz? Shaǵyn kásip pen halyqty qoldaý jónindegi memlekettik baǵdarlamalardy iske asyrýǵa aıryqsha nazar aýdarý qajet. Bul maqsatqa Úkimet tarapynan aýqymdy qarajat qarastyrylýda. Ony utymdy uqsata bileıik. Bul oraıdaǵy jobalar óńir ekonomıkasyna jumys jasap, turǵyndardyń tabysyn arttyrýǵa yqpal etýi tıis», dedi ákim.
Sonymen qatar oblys ákimi óz orynbasarlary men basqarma basshylaryn «Evrohım», «Amangeldi munaı óńdeý zaýyty» sııaqty iri kásiporyndarmen júıeli jumys júrgizýge shaqyrdy. О́ńirdiń keıbir orta jáne shaǵyn kásiporyndarynyń toqtap turýyna qatysty ózekti máselelerdiń ońynan sheshilýine de qol jetkizý qajettigi aıtyldy. О́z kezeginde kásiporyn basshylary jumysshylaryna qamqorlyq jasaýy tıistigi de sóz boldy. Jalaqyny arttyrý máselesi de ózekti kúıinde qalyp otyr. Sondaı-aq, ınvestısııa tartý jónindegi jumystardy jandandyra túsý kerek.
Berdibek Saparbaev oblysta balalar jáne sport alańdaryn salý úshin «Samuryq-Qazyna» qorynan qarjy bólingenin de atap ótti. Olardyń qurylysy Taraz qalasynyń «Qarataý» shaǵynaýdanynda, sondaı-aq, Baızaq aýdanynyń Sarykemer jáne Qordaı aýdanynyń Masanshy aýyldarynda júrgiziledi. Jıyn barysynda Berdibek Saparbaev jaýapty tulǵalarǵa karantındik tártiptiń talaptary men sharttarynyń qatań saqtalýyn qamtamasyz etý qajettigin eskertti. Sonymen qatar ol jaýapty tulǵalardyń nazaryn koronavırýstyq ınfeksııamen kúreste aldyńǵy sheptegi medısına qyzmetkerleri, polısııa jáne basqa da mamandar úshin tıisti jaǵdaılar jasaý kerektigine aýdardy.