Mádenıet jáne sport mınıstrliginiń Onlinedabol jobasy aıasynda «Memlekettik tildi jetildirý» taqyrybynda onlaın kýrstar jalǵasýda. Bul týraly atalǵan mınıstrliktiń baspasóz qyzmeti habarlady.
Kýrsty Qazaqstan Respýblıkasy Mádenıet jáne sport mınıstrligi Til saıasaty komıtetiniń tapsyrysymen «Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy» uıymdastyryp otyr.
Tildik kýrstar óńirlik tilderdi damytý basqarmalarynyń basshylary, til ortalyqtarynyń dırektorlary, ádiskerler, oqytýshylar, magıstranttar men doktoranttarǵa arnalǵan. Onlaın kýrstar 17 sáýirge deıin jalǵasady.
Tórtinshi kúngi kýrsty Mádenıet jáne sport mınıstrligi Til saıasaty komıtetiniń Til saıasaty basqarmasynyń basshysy Amangeldi Qojabek jáne Latyn grafıkasyna kóshýdi súıemeldeý basqarmasynyń basshysy Gúlfarıza Muqanova ótkizdi.
Onlaın kýrsta spıkerler Memlekettik til saıasatyn iske asyrýdyń 2020-2025 jyldarǵa arnalǵan memlekettik baǵdarlamasynyń maqsattary men mindetteri, olardy iske asyrý tetikteri; negizgi nysanaly ındıkatorlar men olardyń túsindirmeleri, ındıkatorlardyń nátıjeli kórsetkishteriniń taldamasy; ortalyq jáne jergilikti atqarýshy memlekettik organdardyń baǵdarlama mindetterin oryndaýdaǵy úlesteri; latyn grafıkasyna kóshý úderisi, óńirlerde atqarylatyn sharalar mazmuny; aldyńǵy memlekettik baǵdarlamamen sabaqtastyǵy, qazaq tilin jetildirý boıynsha jańa ustanymdar, jańa aqparattyq tehnologııalar jetistikterin qoldaný joldary; qazaq tilin oqytý úderisindegi negizgi baǵyttar men jańa kózqarastar, oqytý ortalyqtarynyń áleýetin arttyrý joldary; qazaq termınderin qalyptastyrý men onomastıkalyq ataýlardy jetildirý baǵyttary jáne Memlekettik baǵdarlamadaǵy ózge de máseleler týraly tyńdaýshylarmen oı bólisti.
Aıta keteıik, kýrs barysynda tyńdaýshylar jańa memlekettik baǵdarlamanyń mindetterin óńirlerde iske asyrýda týyndaǵan ózekti suraqtarǵa jaýap aldy. Sonymen qatar, kúndelikti turmysta, áleýmettik salalarda qazaq tiliniń qoldanys aıasyn keńeıtý tetikterin jetildirý joldarymen tanysty. О́ńirlik til oqytý ortalyqtarynyń ınfraqurylymyn, áleýetin arttyrý boıynsha keńes berildi.
Facebook áleýmettik jelisindegi ONLINEda bol paraqshasynda tikeleı efırde júrgizilgen onlaın kýrsqa 129 tyńdaýshy qatysty.