Túrkistanǵa irgeles Kentaý qalasynda salynatyn alleıada oryndyqtardyń barlyǵy syzǵysh, óshirgish, bor sekildi mektep quraldarynyń keskinimen jasalady. Al, kóshe jaryqshamdary qalamsap qalpymen ornalasady.
Qazirgi kezde alleıada qurylys jumystary bastalǵan, jol tóselip, aǵashtar rettelýde. Joba avtory syzý pániniń muǵalimi Nurlyhan Ahpambetov aldymen qala ákimi Dáýren Mahajanovtyń qabyldaýynda bolyp, shaharǵa ustazdar alleıasynyń qajettigin aıtqan. Osy maqsatta jer berýin surap, jobamen tanystyrypty.
«Eskızderin sáýletshilermen birge syzdyq. Avtorlyq quqyq boıynsha arnaıy tirkeldim. Alleıada kitapqa eskertkish qoıylady. Kitaptyń ortasyna ornalasqan sýburqaqtan sý atqylaǵanda beınebir paraqtary ashylyp jatqan sátti kózge elestete alasyz. Qaýyrsyn qalamsaptyń tuǵyry da osy alleıada ornatylady. Sondaı-aq halyq serýendegende balalaryn oınatatyn alańshalar jasalady. Odan bólek, ár oryndyqtyń janyna shahmat taqtaıshasyn ornatý josparymyzda bar», deıdi Nurlyhan Elamanuly.
Alleıany muǵalimder kúniniń qarsańynda paıdalanýǵa berý josparlanyp otyr.