Qyzylordada koronavırýstyq ınfeksııa juqtyrǵan naýqastar sany 149 adamǵa jetti. О́ńirlik kommýnıkasııalar qyzmetinde ótken brıfıngte oblystyq densaýlyq saqtaý basqarmasynyń basshysy Jaqsylyq Ábdisámetov jańadan anyqtalǵan 2 jaǵdaı týraly aıtyp ótti.
- Bul 2 naýqas ta buryn anyqtalǵan naýqastarmen tikeleı qarym-qatynasta bolyp, karantınge alynǵandardyń arasynan anyqtalyp otyr. Qaýipti indet juqtyrǵandar juqpaly aýrýlar aýrýhanasyna aýystyrylyp, tıisti emderin qabyldaýdy bastady, – dedi ol.
Oblysta indet juqtyrǵandarmen baılanysta bolǵandardyń jalpy sany 2181 bolyp otyr. Onyń ishinde, jaqyn qarym-qatynasta bolǵandar sany 1146, janama baılanysta bolǵandar 1035 adam. Búgingi tańda barlyǵy baqylaýǵa alynǵan.
Aımaqtyń bas dárigeri óńirdegi karantındik shekteý talaptarynyń arqasynda tikeleı ınfeksııa juqtyrý deńgeıi tómendegenin de atap ótti.