Keshe Senat Tóraǵasy Qaırat Mámıdiń jetekshiligimen palatanyń kezekti jalpy otyrysy alǵash ret «onlaın» rejiminde ótti. Endi budan bylaı Senat otyrystary tikeleı «onlaın» rejiminde «tvıtter» jáne ózge de mobıldik arnalar arqyly taratylady.
Keshe Senat Tóraǵasy Qaırat Mámıdiń jetekshiligimen palatanyń kezekti jalpy otyrysy alǵash ret «onlaın» rejiminde ótti. Endi budan bylaı Senat otyrystary tikeleı «onlaın» rejiminde «tvıtter» jáne ózge de mobıldik arnalar arqyly taratylady.
«Tek Senattyń ǵana emes, sonymen qatar, turaqty komıtetterdiń de keıbir otyrystaryn qajetti jaǵdaıda osyndaı «onlaın» rejiminde kórsetýge ázirmiz. Parlament qyzmetiniń ashyqtyǵyn pash etetin bul jańalyqtar bizdiń zań shyǵarýshylyq qyzmetimizge oń áser etedi dep oılaımyn», dedi Qaırat Ábdirazaquly jańa jumys jaıyn túsindire kelip.
Budan keıin kún tártibindegi máseleler qaraldy. Bul joly depýtattar nazaryna TMD Ekonomıkalyq sýdıasyn saılaý, qosarlanǵan salyqty boldyrmaý jáne konstıtýsııalyq merzimderdi esepteý máseleleri usynyldy. Depýtattar aldymen sýdıalar máselesin sheship aldy. Qazaqstan Prezıdenti Venera Seıtimovany saılaý týraly Parlament Senatyna usynym jasasa, Elbasynyń bul usynymy palata depýtattary tarapynan qoldaý tapty. Sóıtip, Venera Seıtimova Táýelsiz Memleketter Dostastyǵy Ekonomıkalyq sotynyń sýdıasy qyzmetine saılandy. Buryn osy qyzmetti atqaryp kelgen Sábıt Joldybaev ókilettik merziminiń aıaqtalýyna baılanysty TMD Ekonomıkalyq sotynyń sýdıasy qyzmetinen bosatyldy.
Sondaı-aq, depýtattar jalpy otyrysta «Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konvensııany jáne oǵan Hattamany ratıfıkasııalaý týraly» zań jobasyn qabyldady. Konvensııaǵa 2008 jyldyń 22 jeltoqsanynda Abý-Dabı qalasynda qol qoıylǵan. Maqsat – ınvestısııalar úshin ózara qolaıly jaǵdaılar jasaý. Budan basqa zańdyq qujattyń qabyldanýy Qazaqstan men Birikken Arab Ámirlikteriniń ekonomıkalyq yntymaqtastyǵyn nyǵaıtýǵa serpin berýi tıis. Jáne de konvensııa eki memleket rezıdentteriniń tabystaryna qosarlanǵan salyq salýdy alyp tastaýdy kózdeıdi jáne salyq salýdan jaltarýdyń aldyn alady. Sonymen birge, qujatta tabystyń paıda bolý kózi bolyp tabylatyn memlekette dıvıdendterge, paıyzdarǵa jáne roıaltıge tómendetilgen mólsherlemeler boıynsha salyq salynýy múmkin erejeler qamtylyp otyr.
Budan basqa, «Qazaqstan Respýblıkasynyń keıbir konstıtýsııalyq zańdaryna konstıtýsııalyq merzimderdi esepteý máseleleri boıynsha ózgerister men tolyqtyrýlar engizý týraly» zań jobasy da qoldaý tapty. Atalǵan qujat Konstıtýsııalyq merzimderdi esepteý máselesi boıynsha Konstıtýsııalyq Keńestiń 2012 jylǵy qaýlysyn iske asyrý maqsatynda ázirlengen. Bul rette zań jobasynyń maqsaty konstıtýsııalyq merzimderdiń bastalýyn jáne aıaqtalýyn esepteý tártibin belgileý bolyp tabylady. Elimiz Konstıtýsııasynda barlyq jaǵdaılarda onda kórsetilgen merzimderdi esepteýdiń bastalýy men aıaqtalýy belgilenbeıdi jáne qandaı kúnnen nemese oqıǵanyń bastalýynan merzimdi esepteý sharalary naqtylanbaǵan.
Osyǵan oraı, Konstıtýsııalyq Keńestiń resmı túsindirýimen birqatar zań normalaryna konstıtýsııalyq merzimderdiń bastalýy men aıaqtalýyn esepteý tártibin belgileý usynylady. «Qazaqstan Respýblıkasyndaǵy Konstıtýsııalyq Keńes týraly» Konstıtýsııalyq zańnyń 24-baby jáne Konstıtýsııalyq Keńestiń ótinishti qaraýyna qorytyndy sheshimdi qabyldaýyna zańda belgilengen aılyq merzimniń aıaqtalýyn naqtylaýmen jańa redaksııada jazylyp otyr. Ádilet mınıstri Berik Imashevtiń aıtýynsha, «Qazaqstan Respýblıkasyndaǵy saılaý týraly» Konstıtýsııalyq zańnyń 69-babynyń 3-tarmaǵy ekinshi bólikpen tolyqtyrylady. Onda respýblıka Prezıdentiniń Parlamentti taratý týraly aktisi qoldanysqa engizilgen kún depýtattardyń kezekten tys saılaýy ótkizilýi tıis merzimniń bastalý kezeńi bolyp tabylatyndyǵy kózdelgen. Bul merzim eki aı ótken soń aıaqtalady. Eger merzimniń aıaqtalýyna tıisti kún belgilenbegen aıǵa týra keletin bolsa, onda merzim osy aıdyń sońǵy kúninde aıaqtalady.
Asqar TURAPBAIULY,
«Egemen Qazaqstan».