Qazaqstan Anglııanyń Joǵarǵy Sotynda Ulttyq bank aktıvterine qatysty proseste jeńiske jetti. Bul týraly Ádilet mınıstrliginiń baspasóz qyzmeti habarlady.
«Qazaqstan Respýblıkasy men Qazaqstan Ulttyq Banki Bank of New York Mellon (budan ári – BNYM) londondyq fılıalynda ornalasqan jarty mıllıard dollardan astam Ulttyq banktiń aqshalaı qarajatyna tyıym salý úshin áreketter jasaǵan eki moldavandyq bıznesmenderdi – Anatol jáne Gabrıel Statıdi taǵy da bir jeńiliske ushyratty. Vedomstvoda eske salǵandaı, 2017 jyldyń qazan aıynda Statı taraby belgııalyq sottardan BNYM-ge joldanǵan atqarý buıryǵyn aldy. Sonyń negizinde BNYM 22 mlrd AQSh dollaryn quraıtyn Ulttyq bank shottaryna tyıym saldy. Ádilet mınıstrligi men Ulttyq bank tyıym salynǵan qarajat somasyn 530 mln AQSh dollaryna deıin tómendetti. 2018 jyldyń 25 mamyrynda belgııalyq sot daýdy sheshý úshin Anglııanyń sotyna silteme jasady. Aǵylshyn soty bul máseleni tórtkúndik sot prosesinde qarap, 2020 jylǵy 22 sáýirde sheshim shyǵardy.
Statı zańgerleri aǵylshyn sotyna 530 mln AQSh dollary mólsherindegi aqsha qarajaty Qazaqstan Respýblıkasy aldyndaǵy BNYM bereshegin qurap, belgııalyq tyıym salýdy qoldanýdyń aıasyna kiredi dep habarlady.
Sýdıa Tır olardyń dálelderin qabyldamaı tastap, mynadaı sheshim qabyldady: (i) Qazaqstan Respýblıkasy BNYM men Ulttyq bank arasyndaǵy jahandyq depozıtarlyq kelisimniń taraby bolyp tabylmaıdy, (ii) jahandyq depozıtarlyq kelisim boıynsha BNYM mindettemeleri tek qana Ulttyq bankke tıesili (Qazaqstan Respýblıkasyna emes), (iii) jahandyq depozıtarlyq kelisimge sáıkes BNYM-niń Qazaqstan Respýblıkasyna aqshalaı qarajatty tóleý boıynsha mindettemeleri joq, (iv) Qazaqstan Respýblıkasynyń jahandyq depozıtarlyq kelisimge sáıkes BNYM depozıtterindegi aqsha qarajatyna qatysty BNYM-ge qandaı da bir talap qoıý quqyǵy joq» delingen habarlamada.